Saitualah Minister Prof Lalnilawma’n National Handloom Day vawi 11-na lawmna hun a hmanpui
Vawiin khan Mizoram Handloom & Handicrafts Development Corporation Ltd. (ZOHANDCO) huaihawtin National Handloom Day vawi 11-na lawmna hun chu Dorawta Hall, Saitualah hman a ni a, Minister of State Prof. Lalnilawma chu khuallian niin hun a hmanpui a, Handloom Exhibition a hawng nghal a ni. He hunah hian Khuallian Prof. Lalnilawma chuan thu sawiin, ZOHANDCO-in Saituala National Handloom Day hmanna hun an buatsaih thei chu lawmawm a tih thu a sawi a, Mizote chu pipute atanga puan tah hnam kan ni tih sawiin, amah ngei pawh puantah chhungkua atanga seilian a ni, a ti.Minister chuan 1905 Swadeshi Movement avangin National Handloom Day a lo chhuah thu a sawi a, British puihna tel lovin kan ding chhuak thei a ni tiin, a bik takin puantah hmanga ding chhuak thei kan ni, a ti. Mahnia intodelh tur leh mahni puan tah chawisang a, uar deuh deuh turin inzirtirna kalpui a nih thu khuallian chuan a sawi a, Handloom hi Fashion huang chauh ni lovin Mizo culture leh hnam zia rang phochhuaha chawilarna pakhat a ni, a ti bawk.
Minister chuan state hrang hrangin themthiamna bik, larpui an nei angin, miin kan puantah an hmuh ruala Mizoram chhuak a ni tih an hriat nghal theih tur khawpa chawi lar thiam zel turin puantahtute chu a fuih a. Puantah țanpuina pawh Commerce & Industry atangin tihfel thawkhat a ni a, puantahtute puihna a lo chhuak thuai dawn niin a sawi bawk.Prof. Lalnilawma chuan tun hmaa Mizo la thar chhuah ang kha uar thar leh a, kan la leh puan hralhna hi khawvel hmun zau zawka Zofate hnenah pawh man man zawka hralhna a awm a beisei thu leh kawng zawn ni thei se a duh thu a sawi bawk. Khuallian chuan a thei apiangin puan pho chhuahna (Exhibition) tlawh țheuh tur leh ngai hlu turin Saitual town mipuite a sawm nghal a ni.
ZOHANDCO Chairman Lalliansawta pawhin thu sawiin India ram sawrkarin National Handloom Day hi a ngai pawimawh a, mahni tual chhuak ngei chawisang a, tihmasawn turin hma a la a, mipuite pawhin ngaihhlutna chang kan hriat a pawimawh a ni, a ti. Vawiin hun hmanna hi ZOHANDCO Manager Pu C Lalrinmawia’n a kaihruai a, Rev Thangchhuaka PCI, Saitual Bialtu chuan hunserh hmangin, Minister Prof. Lalnilawma leh Pu Lalliansawta, chairman ZOHANDCO te chuan thu an sawi a. Minister hi Saitual bawrhsap Dr.Lalngura Tlau leh ZOHANDCO a thawktute an țawiawm a ni.Handloom Day puala exhibtion stall 30 buatsaih chu khuallian leh amah zuituten an fang nghal a, naktip Inrinni zing thleng exhibition hian a awh ang. Chawhnu lamah Self Help Group te puala puantah leh a kaihhnawihah inzirtirna neih zui a ni a, Saitual khawpui chhunga SHG leh puan tah lama tui mite an tel țha hle a ni.
