Saitualah Har Ghar Tiranga 2025 campaign pualin kawng zawh
Tukin khan India khua leh tui te hnena India national flag chawimawina leh a hlutzia inzirtir tharna, Har Ghar Tiranga 2025 campaign pualin zirlai naupang ten kawng an zawh a. Naupangte hi CI kawn, Saitual leh Keifang kawn atang kawng zawh tanin, Keifang Centenary Complex-ah an intawkkhawm a ni.
He hunah hian Pu J. Lalawmpuia, SDC chuan thu sawiin Har Ghar Tiranga campaign an hman chhan te a sawifiah a, Tiranga chu Tricolour tihna niin, India flag-a rawng chi thum a entir a, awmze thuk tak a nei bawk a ni, a ti.
SDC chuan British-in rei tak min awp lai khan kan ram chu a rethei hle tih a sawi a, India ramin zalenna kan sual chhuah hnuah erawh dan hnuaiah rorelna mumal tak kenkawh a ni tawh a ni, a ti. Chuvangin India ramin zalenna ropui tak a chan tak kha he flag hmang hian mipuiten hre thar leh se a duh thu a sawi a, zirlai naupangte chu an flag hawn te paih mai loa, chhuang taka dah tha turin a chah bawk a ni. Har Ghar Tiranga 2025 campaign rally ah hian Saitual Town Area-a school hrang hranga zirlai naupangte leh zirtirtute an tel a ni.
