Saitualah Bana Kaih (Hand Holding) hnuaia progress partner thlan chhuahte tan training buatsaih
Vawiin khan DRDO Conference Room, Saitualah, DCIO leh PD, DRDO tangkawp chuan Mizoram Bana Kaih (Hand Holding) hnuaia progress partner beneficiary thlan chhuah mi sawmpahnih (12) te tan ni khat (1) training a buatsaih a, he hunah hian District Bawrhsap Dr. Lalngura Tlau chu khuallian niin hun a hmanpui. Khuallian Dr. Lalngura Tlau chuan thu a sawi a, Bana kaih (Handholding) scheme chu sawrkar flagship programme pawimawh tak a ni tih sawiin, Bana kaih a nih angin harsatna awm thei hrang hrangah pawh inpuih zel a nih tur thu a sawi.
Bawrhsap chuan hlawhtlinna reng rengah kawng awlsam leh short cut a awm lova, hlawhtling tur chuan tei rei peihna leh ti hram hramna a ngai a ni, a ti a, kawng lakah tlu mai lovin harsatna karah pawh beidawng loa hma lam pan zel turin kalkhawmte chu a chah nghal a ni. Khuallian chuan kalkhawmte chu pawisa mamawh tawk inhre turin a chah a, loan a nih angin a hun taka rulh ngei ngei tur a nih thu sawiin, tha taka an thawh chuan midang ti ve tur te tan kawng an lo sah en sak dawn a ni, a ti. Bul tanna chu te mah se tumruhna leh tihtakzetna a awm chuan hlawhtlinna kawng a inhawng zawk a ni tih sawiin, theih tawp chhuah zel turin kalkhawmte chu a fuih a ni.
Vawiina training programme hi Pu V Laldinsanga, Project Director, DRDO chuan kaihhruaiin resource person hrang hrangten progress partner-te training an pe a. Pu Christopher Lalhriatpuia, District Lead Resource Person chuan Mizoram Bana Kaih (Hand holding) nihphung tlangpui leh entrepreneurship awmziate a sawifiah a, Pu VL Ruata, Manager, SBI, Saitual pawhin PMEGP loan chungchang sawifiahin, Pi Lalhriatpuii Hmar, Manager,MRB Saitual pawhin Loan leh a rulh dan phungte a sawifiah bawk a ni. Pi R. Laltanpuii, Asst Rural Development Officer, DRDO chuan lawmthu sawinain training hi a khar a ni.
