Saitual Bawrhsapin Inter District Wrestling Championship 2025 (Freestyle Sub-Junior, Cadet, Junior) a hawng
Vawiin khan Saitual College Hall-ah Mizoram Wrestling Association buatsaih, ni hnih awh tur Inter-District Wrestling Championship 2025 (Freestyle Sub Junior, Cadet, Junior) chu he hun atana khuallian Saitual Bawrhsap Dr. Lalngura Tlau in a hawng. He hunah hian khuallian Dr. Lalngura Tlau chuan thu a sawi a, Saitual District chu wrestling lamah an hmingtha hle a ni tih sawiin, District tihmingthatu category hrang hranga champion an nei chu lawmawm a tih thu a sawi. Dr. Lalngura Tlau chuan India ramin wrestling chu a ngai pawimawh hle a ni, a ti a, international Level ang pawha medal lak tamna ber a ni tih sawiin, hei vang hian wrestling khel mek te pawh ram tana medal hlawh chhuak thei tur khawpa tan la a, theih tawp chhuah turin a fuih nghal a ni.
Bawrhsap chuan wrestling hmasawnna atan hian Saitual District-ah hma lak mek a ni tih a sawi a, wrestling hall sakna tur hmun an nei tawh tih sawiin sak vat theih a beisei thu a sawi bawk. Wrestler te tana taksa insawizawina tur ‘gym’ te pawh buaipui mek a ni, a ti. Bawrhsap chuan Inter District Wrestling Championship-a tel tur te chu theih tawp chhuah a, inelna thianghlim leh inpawh tak nei turin a duhsakna a hlan a ni. Inter District Wrestling Championship, Freestyle Sub Junior, Cadet, Junior-ah hian district hrang hrang atangin inchai tur mi 139 an tel a, a thlengtu Saitual atangin 69, Aizawl 19, Kolasib 18, Serchhip 27, Mamit 5 te an ni.
Inter District Wrestling Championship hawnna inkhawm hi Pu Lalawmpuia, Saitual District Wrestling Association President-in kaihruaiin, Pu Lalrochhuanga Colney, Mizoram Wrestling Association in report tawi a pe bawk a ni. Ninganiah hian Inter District Wrestling Championship 2025 kharna inkhawm neih a ni leh dawn a, MWA President Ngurthansanga chu khuallian niin Wrestling Championship hi a khar dawn a ni.
