Ruihhlo ngaite tana Short Stay Center siam chungchangah Minister Pi Lalrinpuii hovin inrawnkhawmna nei
Ruihhlo ngawlveite enkawlna pakhat atana Short Stay Center din chungchangah inrawnkhawmna (Consultative meeting) chu Social Welfare, Women & Child Development Minister Pi Lalrinpuii hovin nimin (May ni 26, 2025) tlai Aijal Club Conference Hall-ah neih a ni a. He inrawnkhawmna hi Department of Social Welfare, Women & Child Development in tunlai Mizoram boruak thlir chunga an buatsaih a ni. MYC Chairman Pu Malsawmzuala Ralte pawhin he hun hi a telpui a ni. Meeting kaihhruaitu Minister Pu Lalrinpuii chuan ruihhlo tihrem tuma kawng hrang hranga hmalakna kal zelah ruihhlo ngawlvei mekte enkawl chu thil pawimawh tak a nih tel thu leh state mamawh lian tak a nih avanga hemi kawnga ngaihtuahna sen a tul thu a sawi a. SWECD Department chuan hemi kawnga mithiam leh tawngriat nei te nen a inrawnkhawmna neih tha a tih anga he meeting hi koh a nih thu a sawi.
He Consultative Meeting ah hian Mizoram a ruihhlo ngaite enkawlna hrang hrang leh an tun dinhmun te tarchhuah niin, rehabilitation centre/home piah lamah chutiang hmun piah lama ngawlveite lo enkawl hmsakna tur atan Short Stay Center din mamawhna leh harsatna awm theite sawiho a ni a. Meeting chuan din ngei tha tiin, a kalpui dan tur leh enkawl zui dan tur te, hmalak dan tur ngaihtuah tura Committee din ni se tih a ni bawk a. SWWCD Director Dr. Lalhriatzuali Ralte chuan department lo zirchian tawh tarlangin, awmze nei taka ruihhlo ngawlveite enkawl tur chuan a lo ber ah thuang thum in, a hmasa ber ah Detoxification tih pawh a, chumi atan chuan OSC te, OSR centre te, hospital leh adangte ah mithiam enkawlna hnuaia kalpui a, chumi hnu ah Rehab centre emaw, camping hmun te emaw, IRCA etc ah te enkawl zui leh a tul thu leh, chung hmun an chhuahsan hnu ah pawh an taksa leh rilru dinhmun azira medical leh psychological care follow up neih fo a tul thu a tarlang a ni.
He inrawnkhawmnaah hian AMC, Aizawl DC Office, DH&ME, MSACS, Excise & Narcotics, I&PR, Nursing, Ayush, Mizoram Home Guards, SP Aizawl, MPRO, Mental Health Nodal Officer, bakah pawl hrang hrang – Druggist & Chemists Association, FINGODAP, Mizoram Psychological Association, Mizoram Professional Social Workers’ Association, Psychiatry Association of Mizoram aizawh te an tel a ni.
