Ruihhlo Do hian chhungkaw hlimna thlen se kan duh ber – Gen. Secretary, Central YMA
Nizan khan Hunthar Branch YMA chuan YMA Kumpuan Ruihhlo Do Hawnna hun hmangin Prof. Malsawmliana Gen. Secretary, Central YMA chuan Kumpuan hi a hawng. Kumpuan hawnna hun hi Pu Remnalalliana, President, Hunthar Br. YMA chuan a kaihruai a ni. Pu VL Malsawma Renthlei, Secretary chuan Report leh Inhmelhriattirna hun a hmang a, Pu Lalbuatsaiha CEC chuan Lawmthu sawina hun a hmang bawk. Prof. Malsawmliana chuan kumpuan a hawn pah a thusawiin, Ruihhlo hi chhungkaw tikehtu, thalai nun suattu, fahrah leh hmeithai tam tak siamtu a nih avangin tha thlah lovin kan do a tul tak zet thu a sawi a. Mizorama Home leh Centre hrang hranga awm tam ber chu ruihhlo leh a kaihhnawih vang a awm an nih thu leh naupang enkawlna ah pawh chhungkaw inrelbawlna tha lo avanga enkawl an tam a; kumtling lo zingah Pathian awm ringhlel hial an pung ta te hi ruihhlo in a hrinchhuah a ni.
Ruihhlo hian crime a ti pung a, chhungkua tlakranna a siam bawk a. YMA in ruihhlo kan do avang hian chhungkaw tam tak, ruihhlo avanga hlim ni hmel hmu tawh lo leh kehchhe tawh ten hlimna rawn hmuh phah se tih hi kan duh ber a ni. Ruihhlo zuartute hi kan Society ah hian an leng tur a nilo, kan endawng a ngai, tiin a sawi. Pu Sawma hi CEC: Pu Zoramthanga, Pu R. Lalthanzuala, Pu PC Lalthanhlira, Pu RL Thanhnuna, Tv. C. Lalthlamuana, Pu Lalbuatsaiha, Pu Lalrampara, Pu Jacoba Chawngthu, Pu Israela, Pu Anthony Lalruatpuia, Manliana leh Pu PC Lalhuapzauva, President, Vaikawn Branch YMA ten an tawiawm a ni.
Hunthar Branch hi kum 1985 khan Vaivakawn Branch YMA atangin an in dang a ni. He hunah hian Tv. B. Lalnunfela, Syed Mushtag Ali Trophy, Plate Group 3 2025 a Mizoram Team Member chawimawina hun hman a ni.
