Rd&ad minister-in bdo-te tana buatsaih refresher course hawnna hun hmanpui
Vawiin khan Rural Development & Administration Department (RD&AD) Minister Prof. Lalnilawma chuan Block Development Officer-te (BDO) tana buatsaih Refresher Course hawnna programme chu State Institute of Rural Development & Panchayati Raj (SIRD&PR), Durtlang Leitan-ah a hmanpui a. He Refresher Course hi MGNREGA thlaktu VB-G RAM G scheme leh Management Information System zirchianna tura buatsaih niin, January 13-15 chhung a awh dawn a ni.
Minister Prof. Lalnilawma chuan he programme-ah hian thusawiin, BDO kalkhawmte chu an posting-na hmun theuhah tha taka hna an thawk thin chu lawmawm a tih thu sawiin, thingtlang khuaten hmasawnna hmel an hmuh zel theih nan theihtawp chhuah zel turin a chah a. BDO-te chu an block chhunga hna hrang hrang pawimawh tak takte-a mawhphurtu an nih thu sawiin mipuite leh sawrkar department hrang hrangte thawpui thiam a pawimawh thu a sawi a. Minister chuan BDO-te hmalakna tha tak takte tarlangin, kalphung pangai piah lamah tih dan tha zawk leh thil tharte ngaihtuah chhuaka, mipuite tan eizawnna siamsaka, ram hmasawnna tura hna thawk zel turin a fuih a ni.
Pu R. Lalremsanga, Director, SIRD&PR chuan kalkhawmte lawmna thu sawiin, BDO-te chu RD&AD-a a fawng vuantute an nih avangin an hnathawhnaah theihtawp chhuah zel turin a chah a. Dr. Khuangthansanga Pakhuangte, Course Director, SIRD&PR hnen atangin course chungchang inhrilhhriatna neih a ni a, Dr. Lalhruaitluangi Sailo, Sr. CF (Vety) chuan lawmthu sawiin hun a khar a ni.
