Ramri chungchangah Mizoram leh Assam inbe hnai
Mizoram leh Assam ramri buai chingfel tuma state pahnih official-te Guwahati a an inbiak hun atan April ni 25 ruat a ni. Home minister Pu K. Sapdanga’n Akashvani Aizawl a hrilh danin Assam sorkar lamin April ni 25-a state pahnih official te ramri buai chungchang sawi tura an rawn rawtna chu a thuphunga pawm a ni a. An tum dan chuan April ni 24-ah Aizawl chhuahsanin a tukah Guwahati khawpui-ah an inbe dawn a ni. Home department hotute chuan tunge Mizoram ai-awha kal turte tih hi tih chian fak a la awm loh thu leh an hun hman dan tur pawh rawtna a awm chungin sorkar pawmpuina nghah mek a ni an ti. Nikum August ni 9 a Aizawl a Assam leh Mizoram minister-te inbiakna-ah khan kumin March ni 31 ral hma ngei a Guwahati a inbiak chhunzawm ni se tiin thu dah a ni a.
Mahse, Mizoram sorkarin state pahnih minister-te inbiak hma-in official-te inbe phawtin inrem lohna la awmte chingfel hmasa phawt se ti a a rawtna chu Assam sorkarin a chhang lawk lova. Vawi 3 zet lehkha an thawn hnu-ah Assam lam hian state 2 official-te inbiak phawt chu an remti ta a, a hun turah thutlukna an siam tlai avangin tunah hian inbe turin ruahmanna siam a ni ta chauh a ni. Nikum August ni 9 khan Mizoram aiawh home minister Pu K. Sapdanga kaihhruai leh Assam aiawh an border protection & development minister Pu Atul Bora kaihhruaite chu ramri buai chinfelna atan Aizawl-ah an inbia a.
Hetah hian thuchhuah intawm siamin kumin March ni 31 hma-a inbiak chhunzawm ni se an ti a, an tum angin inbiakna an chhunzawm hman ta lova. State pahnih inkar ramri-ah dinhmun pangngai bak engmah chet thawh lo tura intiamin chu chu bawhchhiat a awm lo ni a thudawn a ni. State pahnih official-te inbiak hnu-ah hian minister te an inbe leh tura ngaih a ni a. An inbiak leh chuan inbiak vawi 5-na tur a ni dawn a. Sorkar hmasa hunlai khan chief minister pahnihte vawi 2 an lo inbe tawh bawk a ni.
