Pwd minister pu vanlalhlana’n lengpui airport runway siam that hna thawh mek a tlawh – thlawhna lian chi pawh tum theihna tur 50-pcn ni tura hma lak mek a ni
Vawiin khan Public Works Department changtu Minister Pu Vanlalhlana’n, Lengpui Airport Runway siam that hna thawh mek chu, tha tak leh chak taka thawh zawh thuai a nih theih nan, a hmunah kalin a endik a; Er. H. Zoramliana, Engineer-in-Chief, PWD; Er. David Sapzova, Chief Engineer (Roads), PWD leh Er. Robin Lalrinawma, Chief Engineer (Highways), PWD ten Minister hi an tawiawm a ni.
PWD Minister chuan runway tha neih chu Mizoram tan thil chhenfakawm tak a nih tur thu leh ramin hma a sawn zelna atana thil pawimawh berte zinga pakhat a nih thu a sawi a. Hnathawh lai mek pawh a lungawithlak hlea a hriat thu sawiin, a tha thei ang ber leh a hma thei ang bera thawk zo turin thawktute chu a chah a; ruahman anga thil a kal tluan theih chuan March 31, 2026 hian, runway re-carpeting hi thawh zawh hman an inbeisei thu hnathawktute chuan an sawi a ni.
Lengpui Airport hi kum 1998 ah Mizoram Sorkar PWD siam a ni a; a lo upat ve tawh bakah, a chak zawng pawh 38 PCN (Pavement Classification Number) chauh a ni a, resurfacing-te lo tih tawh thin ni mah se, Aviation lama thuneitu DGCA chuan duhthu a sam loh thu an lo sawi tawh thin a. Mizoram Sawrkar chuan eng tiang taka thawm that ngai nge a nih hre tur leh zirchiang turin CRRI (Central Roads Research Institute) ruaiin, tunah hian Thlawhtheihna lian chi pawh tum theihna tur, 50 PCN tal ni turin, re-surfacing hna hi thawh mek a ni ta a ni.
Re-surfacing hna thawh nan hian Mizoram Sorkar chuan SASCI atangin Rs 91.00 crore a ruahman a, a thawktu atan Airport lama tawn hriat nei tha, Brahma Infra, Rajasthan lam mite rawih niin, anni hian nikum April, 2025 atang khan hmanraw mamawhte chhek khawmin hma an la tan a, Fur a nih avangin duh anga chakin hna an thawk tan lawk thei lo va; November ni 1, 2025 khan trial run neiin, November ni 10 atang khan re-surfacing hna hi an thawk tan ta a ni.
