PWD MINISTER-IN MUP DURTLANG BRANCH DIAMOND JUBILEE LAWMNA HUN A HMANPUI
Pu Vanlalhlana, Minister, Public Works Department chuan vawiin khan M Suaka Hall, Durtlangah Mizoram Upa Pawl Durtlang Branch Diamond Jubilee lawmna hun chu khuallian niin a hmanpui a, lungphun hawngin, souvenir a tlangzarh nghal bawk.Khuallian Pu Vanlalhlana chuan thu sawiin, Durtlang Branch MUP-te’n Diamond Jubilee an lawm thei chu ropui a tih thu leh an inpekna a tihlan thu a sawi a. MUP chu ram innghahna pawl a ni tiin, upate chu hnam rohlu an ni, a ti a. Ram leh hnam hmasawnna atana thurawn pe zel tur leh thalaite kaihruaitu ni turin a fuih a ni.
PWD Minister chuan he hunah hian inkalpawhna kawng tha zawk nei tura theihtawp chhuah mek zel a nih thu sawiin, kalkhawmte hnenah kawng chhiat tan dan a sawi a. Kan kawngpuite pawh a lo tlo zawk nan kawngpui siam leh enkawl chungchangah theihtawp chhuah mek zel a ni, tiin, a bial chhunga Bawngkawn junction traffic avanga harsatna chu sutkian dan a ngaihtuah thu leh mithiamte pawh a rawn tawh thu a sawi a. Aizawl khawchhung kawng chu kumin November thla atanga siamthat vek tum a nih thu sawi bawk.Minister chuan inland water transport lamah pawh sawrkar laipui nen an indawr tawh thu leh survey team-te pawh an rawn kal tawh thu sawiin, Sakawrdai lama kawng survey a neih tumin Darlawn leh North Hlimen mipuite’n chak lak nan lawng an mamawh tih a hnenah an thlen thu a sawi bawk a ni.
He hunah hian Pu Nghaklianmawia, President, MUP General Headquarters chu khualzahawm niin, thu a sawi a. Thusawi tawi Pu Lalnunmawia, Chairman, Local Council Durtlang, Pu Zochhuana, President, YMA Durtlang Branch leh MHIP Durtlang Branch-te atangin ngaihthlak a ni bawk. Pu L. Ringliana, President, MUP Durtlang Branch chuan hun kaihruaiin, Pu B. Rotluanga, Secretary, MUP Durtlang Branch chuan report a pe a. Pu Thanchunga, Finance Secretary, MUP Durtlang Branch-in lawmthu sawiin hun a khar a ni.
