PWD Minister-in Darlak leh Tuidam inkar kawngchhia tlawh
Vawiin khan Pu Vanlalhlana, Hon’ble Minister, PWD, Transport leh Parliamentary Affairs chuan Darlak leh Tuidam kawnga harsatna awmte a hmuna kalin a tlawh a, PWD Minister hi Tuidam PWD IB-ah khawtlang hruaitu, tlawmngaipawl aiawh te’n kawmna an nei zui a ni. Pu Vanlalhlana chuan Darlak leh Tuidam kawng chhiat avanga harsatna awm chu ngaihthah chi a nih loh thu sawiin, a thawmthatna hna thawh tan nan Rs 20 lakh ruahmanna siam nghal a ni a ti a, kawng siam tha turin ni hnih khat maia chinfel theih a ni lo a, furpui hmachhawn lai a nih avangin quarry atanga lung phurh chhuah pawh duhthusama kalpui a harsat rih a rin thu a sawi. NH 44A kawngsial duhthusama hlawhtlinna hmuh tak loh thawhzuina turin PWD lam hotute’n theihtawpin hma an la mek zel a ni a ti bawk.
PWD Minister chuan furpui kan hmachhawn lai a nih avangin kan ram leilung leh kawng dinhmunte a chhiain Sawrkar chuan theihtawpin hma ala a, hna rim taka kalpui zel a ni dawn a ni a ti. Er. Robin Lalrinawma, Chief Engineer (Highways) PWD pawhin NH 44A kawng chungchang leh kawnghlui tuna zawh mek chhiat avanga harsatna awmte chu a changtu Department an nih anga sawizauna neiin he kawng ringtu a bikin khawthlang mipuite dawhtheihna chu fakawm a tih thu a sawi bawk.Pu Vanlalhlana, PWD Minister hi PWD lama hotute leh officials dangte’n an tawiawm a ni.
Vawiin tlai vek khan Tourist Lodge Mamit-ah Pu Vanlalhlana, PWD Minister hovin Pu K.Laltlawmlova, District Bawrhsap, SP Mamit, PWD hotute leh Forest Department bakah Officials dangte leh khawtlang hruaitute’n (NH6 Spurs) Mamit to Bairabi Road kawng sialna tura hmachhawp awmte sawiho a ni a, hemi atana Forest clearance nei tura hmalaknate, mimal in leh lo leh ram a kaltlang tur chungchangah sawihona neih a ni a. Mawhphurhna nei Department te’n mahni chanpual leh tihtur theuhah chak zawka hmalakna kalpui nise tih a ni.
