Phed in mipuite hnena ngenna leh hriattirna thuchhuah siam

Kumin furpui chhungah leh vawiin ni thleng hian Aizawl khawpuiah tui sem tur duhang tawk a awm thei lova, PHE Department chuan pawi a ti tak zet a ni. Tui sem tur a awm tam theih loh chhan chu hetiang hian a sawi theih awm e. Kumin fur tan tirah khan Vaivakawn Zohnuaiah (Phase-III) Pipe line chu lei chein a tih chhiat avangin he Scheme atanga tui pump chhuah thin chu vawiin ni thlengin tui pump theih a ni ta lova. Tlawng Reiek kai atanga Greater Aizawl Water Supply Scheme, Phase-I & Phase-II atanga tui pump chhuah thin pawh ruah a sur apiangin tui tihfim theih loh khawpa a nut nasat thin avang in tui pump chhuah theih zat tur pump chhuah theih ani thin lo bawk a ni. Heti tak a tui a nut nachhan hi tlawng lui fintu luite ah mipuiin leivung kan paih avang te,kawng laihna leivung kan paih avang te leh ramhnuai leimin avang te a ni deuh ber. Tui nut san lai phei chuan NTU 1000 chuang te ni thin a ni.

Aizawl khawpuiin ni tin tui 38 MLD a mamawh a, chutih laiin Greater Aizawl Water Supply Scheme, Phase-I & Phase-II hian ni khatah 25 MLD to 28 MLD (Average) chauh tui pump theih a ni. Hei vang hian Aizawl khawpui chhungah chawhrualin thla khat chhungin tui connection pakhatah tui vawi hnih-khat bak sem tur a awm thei lova, pawi kan ti hle a ni. Phase-III Pipe line Zohnuai a mi hi siam mek a ni a, PWD lamin kawng chhak lam leimin dawlna an siam ve mek a. Ruah a la sur fo avangin leimin hi a la tawlh zel a, hmasawn a harsa viau a, chuti chung chuan ngawrh takin PWD leh PHE te hian hma an la mek zel a ni. November thla chhungin tui pump chhuah leh theih beisei a ni e.

Aizawl khawchhungah hian mimal tuizem atang leh pipe line atang a tui leak ven hna theih tawp in Department in a thawk a,hma pawh kan sawn hle in kan inhria. Tui leak report na tur Water Leak Report Apps siam a ni a. Hei hi hmang tangkaiin mipui lamin PHED min tanpui a report hi min pe thin turin kan ngen a ni. Vawiin ni thleng hian he Application kaltlang hian tui leak report hmun 310 chuang atangin report dawn tawh a ni a, a rang theiang bera siam that hna thawh nghal zel a ni bawk a ni. Hei bakah hian mimal tui dahna tanga tui liam ven nan Ball Float Valve vuah hi Department chuan tha a ti a, mipui hnena ngenna tih chhuah a tum mek bawk a ni. Tui ren chungchangah te, ruah tui khawl chungchangah te, tui leak ven chunchangah te leh mipui in tur tui lak tibawlhhlawh thintu leivung leh bawlhhlawh te hi a paihna hmuna paih turin PHE Department chuan mipuite thawhpuina a sawm tak meuh meuh a, tun hnaia tui sem that theih loh chungchangah mipui te hriathiam na a ngen tak meuh meuh bawk a ni.