Online Border Check Post Module Mizoramah hman tan a ni dawn
Mizoramah Online Border Check Post Module hman tan a ni dawn ta a. Hemi pual hian vawiin khan Transport Director Er. R Lalrammawia hoin Transport Directorate Conference Hall-ah hun an hmang.Director chuan thusawiin, Mizoram Transport Department chuan mipuite tana zangkhai, dik leh awlsam zawka entry tax lak a nih theihna turin theihtawp chhuahin hma a la a, NIC nen tangkawpin tunah hian Online Border Check Post Module hman theih tura peihfel a lo ni ta a ni, a ti.
“Sawrkarin a tul angin thawktute min pek belh a, hmanraw leina tur sumte min pe bawk a, Transport Department leh NIC tangkawp chuan lirthei te tlan vel awlsam zawk nan Border Check Post Module chu 1st December 2025 atang chuan Live server-ah a deploy ta a ni”, Er R Lalrammawia chuan a ti a. Lirthei hmanga zin veivak mipuite leh sumdawng lirthei State dang atanga lo lut te tan awlsamna a thlen an beisei thu sawiin, Mizoram State-in State changkang zawkte tihdan anga he Module kan hmang thei tur hi Transport department chuan lawmawm kan ti hle a ni, a ti bawk.
State dang atanga lirthei (Commercial Vehicle) lo lutte hian kan state-a an rawn luh hian Entry Tax an chawi a ngai a, chu entry tax chu Enforcement Check Gate-a duty ten manual receipt hmangin an lo la thin a, chu chu Mizoram sorkar chhiahah chhunluh a ni leh thin a. Border Check Post Module hi computer hmanga common portal kaltlanha online-a awlsam leh dik taka entry tax lakna tur a ni.Mizoramah hian he Border Check Post Module hmanna tur hi hmun hnih – Vairengte Enforcement Check Gate leh Kanhmun Enforcement Check Gate ah te a awm a. He hmunah hian state dang lirthei (Commercial Vehicle) lo lut reng rengte chu awlsam takin entry tax an lo la zel tawh dawn a ni.
