O-dôh ku hlim taka lawm a ni
Mara Kut zinga ṭhalaiten hlim taka an hman ṭhin “O-Dôh Ku” chu vawiin khan Akashvani CRS Siaha huaihawtin New Siaha Multipurpose Hall ah hlim taka hman a ni.
Vawiina hun hman hi Mara Autonomous District Council Deputy CEM Pu S. Lalremthanga chuan khuallian nia hmanpuiin Mara Kut zinga pawimawh tak tuai thar ani chu lawmawm atih thu a sawi a, khawvel changkang zelah tihdan phung a inthlak chho zel tih sawiin pipute aṭanga ṭawng leh hnam tihdan phung anlo humhalh ṭhin chu chhunzawm zel a pawimawh thu a sawi a, mahni hnam thiltih chu ngaihhhlut leh chawisan a pawimawh thu a sawi.
Dy CEM chuan Mara Hnam pawimawhna leh a ṭobul bakah hnam ziarang pawimawhna hrang hrang zirna chu MADC huamchhunga zirna in hrang hrangah an zir theih nan hma an la tih sawiin naupang aṭanga hnam bulpui hriat a pawimawh thu a sawi bawk.
Khualzahawm Akashvani Mizoram Director leh Cluster Head Pu DR Lalropuia chuan khawvel hmasawn zelah hnam ziarang vawn him zel a pawimawh thu sawiin hemi kawngah hian Akashvani CRS Siaha chu an thawhhlawk hle a ti a, IT Khawvelah Radio pawimawhna chu ala ngai reng tih sawiin mipuite tana pawimawh puanchhuah bakah rimawi hmanga mipuite awm tlei kawngah a pawimawh hle a ti a, ṭawng dik hman kawngah midang zirtirtu pawimawh tak ani tih a sawi.
Vawiina hun hmanah hian zai leh lama hun hlim tak hman a ni a, Mara Thyutlia Py (Mara Ṭhalai Pawl) Branch hrang hrang ten hnam lam an entir bawk a ni.
“O-Dôh Ku” hi Mara ina kut an neih pawimawh zinga mi niin ṭhalai ten intihhlimna Kut atana an hman ṭhin a ni a, Mara Kut ropui Lyuva Khutla hma chiaha hman ṭhin niin hnam ziarang pholang thei zai leh lam te nen hun hlimawm tak hman ṭhin a ni.
