Ni hnih awh tur Mizoram Literature Festival chu vawiin khan Aijal Club, Aizawlah tan a ni
Mizoram Literature Festival Organising Chairman Pu Vanlalruata Ralte chuan Akashvani palai zawhna chhangin Mizoram Literature Festival chu a tum khatna a nih thu leh The Book Cafe, Aizawl leh Sahitya Academy tangkawp buatsaih a nih thu a sawi a. Pu Vanlalruata Ralte chuan India ramchhungah tawng avangin mihring an inthen hrang nasa hle tih sawiin chu inthenhranna, diversity chu mipuite thenhrangtu ni lo a, literature hmanga pawtkhawmtu a nih zawkna turin an duh thu a sawi a. Social media in zawimuangin ziak leh chhiar a rawn luahlan chho avangin lehkhabu chhiar lama phurna thar tuh an tum thu a sawi bawk a ni.
Mizoram Literature Festival huaihawt a nih theihna tura mi pawimawh hrang hrang hnenah lawmthu sawiin Pu Vanlalruata Ralte chuan Mizoram Literature Festival chuan nghawng tha tak nei se duh thu a sawi a. Zirlai tam tak, ti ve mai mai thin ten literature chu tuichilh tak tak se a duh thu sawiin literature chu ram hruaitu tha, mi fing siamtu a nih thu a sawi a. Ziakmi mai bakah lehkhabu chhiar thin lo pung se, mipuiten tan la thar leh se tih chu an duh ber a nih thu a sawi a ni.
Mizoram Literature Fetival-ah hian ziaktu hrang hrang – Prof Joy LK Pachuau Jerry Pinto, Shinie Antony, Sanjoy Hazarika leh midangte an lokal a. India rama Dominican Republic Ambassador HE David Piug a tel a, Mizoram Literature Festival hawngtu tura beisei Chief Minister Pu Lalduhoma chu a remchan loh avangin a tel lo a ni.
