Naktuk a Sinlung Hills Council bial 12-a inthlan vote thlak tur atana ruahmanna siam chu peih fel a ni tawh
Mizoram State Election Commission Secretary Pu K. Laldingliana chuan naktuk a Sinlung Hills Council inthlan neih tur atana inbuatsaihna chu peih fel a nih tawh thu hi a sawi a. Akashvani Aizawl zawhna chhangin Mizoram State Election Commission Secretary chuan naktuk zing dar 7 atanga tlai dar 4 thleng ballot paper hmanga vote thlak a nih tur thu leh vote tla tur a tlak zawh a, vote thlakna ballot box-te chu bial tin hmunpui a kim taka phurh thlen a nih hnuah vote tla te hi chhiar nghal a nih tur thu a sawi a. Venhimna pawh District pathum a District Election Officer leh SP theuh-te ruahmanna ang a uluk taka ruahman a ni, a ti. Pu K. Laldingliana chuan Sinlung Hills Council inthlanna lo awm turah hian Polling station venhimna uluk zual ngai (critical polling station) 16 a awm thu leh Quick Response Team-te pawh uluk taka duty tura ruahmanna siam a nih thu sawiin Assam leh Manipur hnaih ramri-ah te pawh tul bik natna leh chhiat tawh tih lovah chuan veivak awm lo tura ramri khar vek a nih thu a sawi bawk. Pu K. Laldingliana chuan vote nei zawng zawngte vote thlak turin a sawi a. Boruak muanawm tak hnuai a inthlanna kalpui a nih theih na’n political party, tlawmngai pawl leh mipui zawng zawng thawhpuina a ngen bawk a ni.
State Election Commission Secretary chuan Sinlung Hills Council-ah vote nei mipa-11,875 leh hmeichhia 11,914 an vaiin vote nei 23,789 an awm thu a sawi a. Inthlan hmasak ber, kum 2019 inthlan a vote nei mi 20,914 nena khaikhinin, vote nei punna zat chu 2,875 a nih thu a sawi bawk. Sinlung Hills Council inthlanna chuhtute hi BJP-1, INC-12, MNF-10, ZPM-8, HPC-4 leh independent 14, an vaiin 49 an ni a. Bial 12 awma bial 6 hi Aizawl district-ah awmin Saitual district-ah bial 4 leh Kolasib district-ah bial 2 a awm bawk a ni. District pathuma inthlan buaipuitute hnen atanga thu dawn danin inthlanna buaipuitu tur polling party-te hian an duty-na tur polling station an thleng kim vek tawh a. Aizawl district a duty turte hi chhun dar 12 khan an duty-na hmun tur chhuahsanin chawhnu lamah an thleng kim a. Polling station 19 a awm a, presiding officer 19 leh polling officer 38 awmin an vaiin 57 an ni. Saitual district bial 4 a inthlan buaipuitu leh venhim hna thawktute pawhin vawiin tlai khan an duty-na tur hmun an thleng kim a.
Kolasib district a Saipum leh Saiphai bial a duty tur polling offial leh venhimna lam buaipuitute pawhin chawhnu dar 3 pelh khan an duty-na tur polling station an thleng kim a ni. Inthlan campaign hi Pathianni tlai dar 4 khan a tawp a, political party leh candidate-te erawh chuan Inrinni tlai lam khan campaign hi an khar tawh a. Campaign chhung hian election model code of conduct bawhchhiatna lian tham a awm thu an dawng lo niin state election commissioner Dr. H. Lalthlangliana chuan a sawi a ni.
