MZP din champhaphak vawi 90na hman a ni
MZP President Dr. C. Lalremruata’n MZP chu hrechiang lova nuihsawh leh beitu an tam tih sawiin, heng mite hi sorkar hna a dik lo taka lut te, hnamdang sumdawng mawngzawmpuia hlawkna tel ve te leh an chhungte an ni duh tlangpui tih a sawi.He thu hi vawiina Zirlaite ni leh MZP kum 90-na lawmna I&PR Auditorium a neihah sawiin, MZP President Dr C. Lalremruata chuan MZP chu hrechiang lova social media-a nuihsawh leh beitu an tam tih sawiin, vawikhatmah MZP constitution la chhiar loten MZP in an kuang lo an nawr titu chu sorkar hna a dik lo taka lut MZP in bang tura an nawrte, hnamdang sumdawng mawngzawmpuia hlawkna tel ve te leh an chhungte an ni duh tlangpui a ti a. MZP hrechiang lova nasa taka beitute chu pawn lam atanga MZP en lova a chhung ngeia en turin a sawm a, MZP chu zirlai pawl a nih angin zirna an ngaipawimawh tur a nih rualin nationalism an buaipui lo a nih chuan MZP chu engtikahmah a sang ngai dawn lo a ti a, zirna leh nationalism chu Mizo Zirlai Pawl innghahna, a lungphum a ni a, rualkhai taka a kal zel theih nan theihtawpa hmalak a tul hle a ni a ti.
MZP President chuan MZP chu Political Party tel lo zirlai pawl thianghlim tak a nih angin MZP atanga chhuak tawh Politics a inhmang leh inhmang lo te chu MZP inthlana thuk taka inrawlh tawh lo turin a ngen a, September thlaa MZP hruaitu thlanna neih zawh takah khan MZP thianghlimna leh zahawmna tihbawrhban hlauhawm khawpin inbeihna a thleng tih sawiin, MZP chu pawl zahawm tak anga a kal zel theih nan MZP atanga chhuak tawh te chu MZP inthlannaa in rawlh tawh lo turin a ngen a ni.
Education Minister Dr.Vanlalthlana pawhin MZP din champhaphak vawi 90-na leh Zirlaite Ni pualin Mizoram chhung leh pawna zirlai zawng zawngte chu an zirna kawngah Pathian malsawmna an dawn zel theihnan duhsakna hlanin chibai a buk a, zirlaite chu rilru hriselna tha tak nei tura chahin ruihhlo leh zuk leh hmuam laka insum turin a chah a, zirlaite chu ram leh hnam hmakhua an nih avangin rilru leh taksa hrisel tak nei turin a chah a ni.Vawiina I&PR Auditorium, Treasury-a Mizo Zirlai Pawl din champhaphak vawi 90-na leh Zirlaite Ni an hmannaah hian, MZP chuan hruaitu hlui an chawimawi a, Thupui atan ‘MZP Hmathlir’ tih chu Dr Vanlalremruata Tonson an a sawi a, zirlai pawl hmasawnna tur hrang hrang leh Mizo zirlaite hmasawnna tur sawiho a ni a. MZP din champhaphak pual hian nimin Pathianni khan Hmangaihte Run, Zemabawk leh Gansabra, Luangmual ah tanpuina pek a ni bawk.
