MLA Er. H. Ginzalala’n Khawzawlah Alu chi (Potato seed) a sem
Adviser to CM (Technical) leh Champhai North bialtu MLA Er. H. Ginzalala chuan vawiin chawhnu dar 1:30 khan Khawzawl Krishi Vigyan Kendra (KVK) Training Hall-ah Indian Agricultural Research Institute (IARI) NEH Scheme atangin Alu (var kufri jyoti) chi a sem a, he hunah hian khuallian a ni nghalin thu a sawi bawk.
MLA Er. H. Ginzalala chuan Khawzawl KVK chu a pawimawh zia leh kuthnathawk tu te tan a pawimawh zia sawiin an hmalak leh zelna turah thawhhona tha tak an neih a beisei thu a sawi a ni. Thingtlang khaw thenkhatah te chuan water solar pump nen buh nilo in kiwi chu an chin tawh tur thu sawiin hma lak mek zel a ni tih a sawi a. Khawzawl district khaw hrang hrangah te chuan thlai chin uar an tum thu leh Khawzawl KVK nen tha taka an thawh ho theih a beisei thu sawiin a sawm a. Kan economy chu Horticulture atang hian nasa takin kan thlak theih thu te sawiin heti lam kawngah pawh kuthnathawk tu te an pawimawh thu a sawi a. Kuthnathawktute chu an kal zel na tur ah duhsakna a hlan a ni.
He hun hi Dr. Malsawmkimi Senior Scientist & Head chuan a kaihruai a. Champhai leh Khawzawl district chhunga khua Neihdawn, Vanchengpui, Zotlang, Tuimuk, Biate leh Tualpui atanga alu chingtu lo kal te hnenah alu chi hi pek an ni a, quintal 50 sem a ni. Pu Rambuatsaiha, SMS (Agronomy), KVK, Khawzawl chuan Alu chin leh enkawl dan chungchanga kuthnathawktute hriattur pawimawh zirtirna a pe nghal bawk a ni.
