Mizoram Tourism inelna buatsaiha pakhatna lawmman dawngtu Serchhip District
Mizoram Tourism buatsaih, Mizoram District tin te inelna Tour Itinerary Creation Competition ah Serchhip District chuan lawmman pakhatna a dawng a. Vawiin khan Additional DC Pu Lalrinzuala kaihruaiin a lawmna hun buatsaih a ni a, DC Pu Paul L Khuman a hmanpui a ni. Tourism Department-a Deputy Director Dr. R Lalrinchhani pawhin he hunah hian thusawiin Serchhip District-in tourism hmasawnna atana hmunhma a neih thatzia te, a bik takin Thenzawl chungchang sawiin Sawrkar Laipui Ministry of DoNER hnuaiah Global Model Site atan Thenzawl chu thlan a nih thu a sawi a ni.
He hunah hian Mizoram Aero-Sports Association President Pu J.Vanlalliana chuan Serchhipa International Paragliding Accuracy Championship neih tur chungchang te, paragliding kaihhnawiha Serchhipin Tourism potential a neih thatzia te a sawizau bawk a ni.
Tourism-a Serchhip District-in hma a sawn zel theih nan he programme-ah hian officer rual te leh khawtlang hruaitute, MJA te leh tlawmngai pawl aiawh kalkhawmten sawihona hun an hmang zui a ni.
