Mizoram ram chhunga kutthlak Tripura sawrkarin an ti tawp
Home minister Pu K. Sapdanga chuan Mamit bawrhsap-in a hriattir hnu-ah North Tripura district thuneitute chuan Phuldungsei ram Thaidawr a kawng an rawn laih chu an tihtawp nghal thu a sawi.
Pu K. Sapdanga’n Akashvani Aizawl a hrilh danin sorkarin ti tura a hrilh angin Mamit bawrhsap Pu K. Laltlawmlova chuan North Tripura bawrhsap Pi Chandni Chandran chu Nilaini tlai khan be nghalin Thaidawr a kawng an rawn siam chu chawlhsan turin a hrilh a, an hna pawh an chawlhsan nghal a ni. Home minister chuan he lai a ram inchuh chungchangah hian Mamit leh North Tripura bawrhsapte chu inbe tura ruahmanna siam a nih thu a sawi a. A tul dan a zirin state sorkar thuneitute inbiakna tur pawh ruahman theih a nih tur thu a sawi bawk.
Puan tawh angin Tripura sorkarin Thaidawr-ah kawng an siam tih hriat a nih ve leh Mizoram sorkar chuan Forest Minister Pu Lalthansanga chu a hmunah a tir nghal a. Minister hian Phuldungsei khawtlang hruaitute nena an inkawmna-ah he lai hi sorkarin a ngaihthah rei avangin Tripura lam hian kawng an rawn siam ni a sawiin tun atang chuan sorkarin ngaihsak chhoh zel a tum thu a sawi a ni. MZP hruaitute pawhin Tripura sorkarin Thaidawr tlang panna tur kawng a laih hi tlawhin tihtawp vat a nih theih na’n Mizoram sorkar chu hma la turin an ngen a a ni.
