Mizoram Rajya Sabha MP in Delhi khawpuia handloom phochhuahna awm se a duh thu a sawi
DONER Consultative meeting nimina neihah Rajya Sabha MP Pu K Vanlalvena’n Mizoram Handloom dehchhuahte regular a pho chhuahna tur Delhi khawpuiah Show Room Mizoramin a mamawh thu a sawi.
Parliament House Annexe buildinga nimina hun hmanah Pu K Vanlalvena chuan Mizoram chanve dawn chu Mau hmun a la nih thute leh mau leh hruihnang atanga thil siam chhuahte a lo pun zawk theih nan Mizoramah Handicraft Training Institution changtlung din a tul thu a sawi bawk a ni.
DONER Consultative Meeting hi Union Cabinet Minister of DONER Jyotiraditya M.Scindia chuan kaihruaiin MoS DONER leh MP 7 te bakah mi pawimawh eng emaw zat an tel a, Mizoram Rajya Sabha MP hian thutkhawm hmasaa a lo sawi chhuah tawh Sangau atanga Saisihchhuah kawngpui laih hna thar thawh leh tura ngenna DONER Minister hnenah a thehlut nghal bawk a ni.
