Mizoram PWD ten kawngpui thar sial hmabak tam tak an nei
Mizoram PWD hotute chuan kawngpui thar sial hmabak, a vai a belhkhawma kilometer 833 leh metre 85 a thui an neih thu an sawi. Chanchinbumite zawhna chhangin Mizoram PWD hotute chuan PMGSY ruahmanna thar, PMGSY-III hnuaiah kawng 17, a vaia belhkhawma kilometer 487.50 a thui siamna tur sum ruahman, cheng vaibelchhe 469 leh nuai 62 an hmuh tawh thu sawiin a thawktu tur contractor pawh thlan fel an nih tawh bakah hna tan thuai tura an inbuatsaih mek thu an sawi a.
Hei bakah hian PM- Devine hnuaiah Aizawl By-Pass (Aizawl tlak lam) sialna tura cheng vaibelchhe 500 an hmuh tawh thu leh contractor pawh thlang fel tawhin hna thawhna tur thuthlung pawh ziah fel thuai tum a nih thu an sawi.
Mizoram PWD hotute hian Finance Commission 16-na chu kawngpui kilometer 307 leh metre 80-a thui siamna atana sum ruahman cheng vaibelchhe 1,142 leh nuai 32 chu an dil thu leh hmuh ngei an inbeisei thu an sawi a, hei bakah hian NABARD hnuaiah kawng panga a vai a belhkhawma kilometer 38 leh metre 55 a thui sialna tur detailed project report cheng vaibelchhe 67 leh nuai 24 an thehluh chu sanction an la hmuh loh thu an sawi bawk a ni.
