Mizoram Pollution Control Board (MPCB) in Green Mizoram Day 2025 an lawm
Vawiin hi Green Mizoram Day 2025 niin Mizoram puma lawm a nih rualin Mizoram Pollution Control Board (MPCB) chuan lawmna hun an hmang.
Aizawla Green Mizoram Day lawmna pui ber chu Zokhawsângah 34th Assam Rifle Complex-ah niin MLA Pi Baryl Vanneihsangi hoin hman a ni a, ruah tui khâwl nân thing i phun uar ang u tih thupui hmangin environment vênhim kawnga inzirtirna leh ram kâng vênhim kawnga titha khuate hnênah lâwmman sem nghal a ni bawk. Zokhawsângah hian MPCB staff-te pawhin nikum 2024 Green Mizoram Day-a thing an lo phun tawhte en felin an hnatlâng nghal.
Green Mizoram Day denchhen hian MPCB chuan kum tina an lo tih thin angin thing tiak phun tur thahnem tak an la khâwm leh a, sikul leh college hrang hranga Eco club-te phun turin an sem chhuak leh a, MPCB hian hmun hrang hranga an motor khu test-na hmunahte thing an phun bawk a, nilêngin an office leh a chhehvêlte tifaiin an hnatlâng nghal bawk.
