Mizoram Larsap-in Prof. Laltluangliana Khiangte lehkhabu ziah 3 te a tlangzarh
Mizoram Larsap, General (Dr) Vijay Kumar Singh, PVSM, AVSM YSM (Retd), Chief Rector of Mizoram University ni bawk chuan vawiin khan Prof. Laltluangliana Khiangte, Dean, School of Humanities and Languages, Mizoram University (MZU) lehkhabu ziah 3, Anti-Colonial Chieftainess: Lalnu Ropuiliani, Indigenous Tribal Worrior: Pasaltha Khuangchera leh Anti-Colonial Hero: Mizo Lal Zakapa tih lehkhabute chu Seminar Hall, Academic & Seminar Complex, MZU ah Khuallian niin a tlangzarh.
Mizoram Larsap, General (Dr) Vijay Kumar Singh (Retd) chuan Mizo history leh culture tarlanna lehkhabu 3 te mipui chhiar theiha tlangzarh a ni chu lawmawm a tih thu sawiin, lehkhabu ziaktu Prof. Laltluangliana Khiangte hmalakna fakawm a tih thu a sawi a. Prof. Laltluangliana Khiangte chu literature, zirna leh Mizo hnam ziarang vawnhim lama sulhnu ngah leh thiamthil ngah tak a nih thu sawiin, Padma Shri (2006), Sangeet Natak Akademi Puraskar (2018) leh Rastriya Lok Bhasha Samman (2003) chawimawina a dawnte hian Indian arts leh culture vawnhim kawnga a thawh hlawk zia a tarlang a ni, a ti bawk.
Larsap chuan Mizo hnam chanchina mi pawimawh tak tak – Lalnu Ropuiliani, Pasaltha Khuangchera leh Lal Zakapa te chanchin ziahna lehkhabu 3 te chuan zirtir leh kawhhmuh hrang hrang nei mah se, pawnlam awpbeh tumna laka zalen tura huaisen taka beihletna an tarlang a ni, a ti a. India ram hmun hrang hranga chengte chanchin ziahna tam zawk chu min awpbettute ziah a nih thu sawiin, midangte hriata kan hnam ziarang dik tak kan pholana, thangtharte hnena kan chawr chhuah dan dik kan hrilh chhawn theih nan keimahni hnam ziarang mila dik taka history kan ziah that lehte pawh a tul thu sawiin, hemi tur hian zirchianna nasa zawka kalpui pawh a tul a ni, a ti bawk.
He hunah hian Prof. Dibakar Chandra Deka, Vice Chancellor, MZU in kalkhawmte lawmna thu sawiin, lehkhabu ziaktu Prof. Laltluangliana Khiangte hnen atangin thusawi ngaihthlak a ni a. Lehkhabu 3 te thlirlawkna neih niin, Dr. Samuel L. Chuaungo, Department of Sociology, MZU chuan ‘Anti-Colonial Chieftainess: Lalnu Ropuiliani’ thlirlawkna a nei a, Dr. R. Zothanliana, Department of Mizo, MZU in ‘Indigenous Tribal Warrior: Pasaltha Khuangchera’ tih lehkhabu thlirlawkna neiin, Dr. H. Laldinmawia, Department of Mizo, PUC in ‘Anti-Colonial Hero: Mizo Lal Zakapa’ tih thlirlawkna a ziah chu chhiar chhuah a ni a. Pu LTL Fela’n lawmthu sawiin hun hman a khar a ni.
