Mizoram Larsap-in Mamit District a tlawh
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mamit District a tlawh. He hunah hian Sawrkar department hotute, tlawmngai pawl aiawhte, Political party hruaitute leh Ex-Servicemen-te kawmin Aspirational District hnuaia hmalaknate a tlawh bawk a. Larsap hi Mamit Tourist Lodge tualah Mamit DC Pu K.Laltlawmlova, SP Pu Manny Bhushan Singh leh official dangte’n lo hmuakin Guard of Honour pek a ni. Mamit District chhunga Sawrkar Department hotute DC Conference Hall-a a kawmnaah Larsap General (Dr) Vijay Kumar Singh chuan District hnufum leh chawikan ngai Mamit District-a hmalaknate fakawm a tih thu a sawi a. Hriselna lama inenkawlna ngaihpawimawh a tul thu sawiin, health facility hrang hrang awmsa, Health & Wellness Centre leh Hospital-te chu hriselna kawnga scheme pawimawh tak takte nena tha taka thlunzawma hmalak a tul thu a sawi a. Zirna bikah upper primary atanga secondary education zawm an tlem thin chu chinfel dan ngaihtuah a tul thu sawiin, zirlaite’n thiamna tak tak, nakin zel atana chhawr tangkai theih tur an neih theih nana tanlak a tul thu a sawi a. Digital India hmalakna kalpui kawngah CSC te an pawimawh thu leh tihchangtlun a tul thu a sawi bawk.
Larsap chuan mirethei, hmeichhia leh naupangte tih hmasawnna turin Sawrkar laipuiin scheme 110 vel a duan thu sawiin, official-te chu heng scheme-te hi tha taka kalpuia, a dawng turte’n an dawn ngei theih nana tan la chhunzawm zel turin a chah a. Aspirational District hnuaia target siamte tha taka hlenchhuah zel tum tur leh tehna hrang hrangah a ti tha ber nih tum turin a chah a. Ramri depa awm a nih avangin ruihhlo tawlhte theihtawp chhuaha do a tul thu sawiin, khawtlang leh ram tichhe thei do kawngah kan zavaia tanrual a tul a ni, a ti a. Kalkhawmte chu District leh State hmasawn nana mawhphurhna pawimawh tak nei an nih thu sawiin, hmasawn zel tura theihtawp chhuah tur leh scheme tha takte a nihna ang taka kalpui tuma tan la chhunzawm zel turin a chah a ni.
He hunah hian Mamit DC Pu K. Laltlawmlova chuan Mamit District chanchin, inrelbawlna leh Sawrkar hmalakna tlangpui a sawi fiah a. Mamit SP Pu Manny Bhushan Singh hnen atangin Dan leh thupek kenkawh kawnga hmalaknate ngaihthlak niin, Pi Carolyn L.B. Khiangte, Addl. DC in lawmthu sawiin hun hman a khar a ni. Hemi hnu hian Larsap hi BSF hotute’n ramri ven kawnga an hmalaknate an hrilh fiah a. Tlawmngai pawl, Ex-Servicemen leh Political party aiawhte DC Conference Hall-ah a kawm a. Aspirational District hnuaia hmalakna DC Complex-a PMJVK kaltlanga Sports Infrastructure hrang hrang siamte, Common Service Centre, Venghlun leh Anganwadi Centre-III, Bazar Vengte a tlawh nghal bawk.
