Mizoram Larsap-in Lunglei District a tlawh
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan lehlangin Lunglei District a tlawh. Sawrkar department hotute, tlawmngai pawl leh Kohhran hruaitute leh Ex-Servicemen-te a kawm a. 20 Assam Rifles Hqrs. tlawhin sipaite a kawm a, War Memorial-ah sipai martarte zahna lantir nan pangpar a dah bawk. Larsap hi Kawmzawl Helipad-ah Bawrhsap mawhphurhna la mektu Addl. DC Pi Rochuangkimi Khenglawt leh SP Pu J. Lalmuankima te’n lo hmuakin 2nd Bn MAP te’n Guard of Honour an pe a. 2nd Bn MAP English Medium School, Pipe Band te’n rimawi mawi taka tumin an lo hmuak bawk a ni. Lunglei DC Conference Hall-a Sawrkar Department hotute a kawmnaah Larsap General (Dr) Vijay Kumar Singh chuan Mizorama khawpui hmasa berte zinga mi Lunglei a tlawh thei chu lawmawm a tih thu sawiin, DC office kaltlanga ngaihsak ngai zual miretheite thleng pha scheme tha tak tak kalpui a ni chu entawntlak a tih thu a sawi a. DC office pan harsate tan remchang siam saka an harsatnate chinfel sak zel tum turin a chah a. Sawrkar laipuiin zirna tihhmasawn nan sum leh pai tam tak a sen thu leh Mizoramah ngei pawh school tha tak tak, Eklavya Model Residencial School, Kendriya Vidyalaya leh Jawahar Navodaya Vidyalaya-te mitin banphaka a chhawp chhuah thu sawiin, hengte hi Central Service-a inziahluh nana chhawr tangkai tum turin mipuite a chah a ni.
Larsap chuan hmeichhia, naupang, thalai, loneitute leh miretheite tan Sawrkar laipuiin scheme tha tak tak a siam thu sawiin, hengte hian hamthatna dawng tur dik takte a thlen theih nana theihtawp chhuah tur leh a tulna apianga kaihkawpa thawhhona tha nei turin department hotute a chah a. Dan leh thupek kenkawh leh ruihhlo do kawngah khawtlang huapa tanrual a tul thu sawiin, NGO leh Kohhrante chu hemi kawngah hian theihtawp chhuaha Sawrkar thlawp zel turin a fuih a. Thenawm ram leh kan chhehvela thil thlengte ngaihvena beng chhit tlan reng a tul tih sawiin, dan leh thupek kenkawh leh ram venhim kawngah mipuite chu thuneitue tha taka tawiawm tlat thin turin a chah a ni. Addl. DC Lunglei Pi Rochuangkimi Khenglawt chuan inlawmna thu sawiin, Lunglei District chanchin tlangpui leh DC office kaltlanga hmalaknate a tarlang a. Healthy Lunglei District Campaign hmangin mipui hrisel zawk nan natna inkaichhawn theih loh zawn chhuah beihpui camp tum 39 neih a nih thute, vohbikte tan Project LEAP kalpui a nih thu leh District chhunga khaw 6 ah Good Governance Campaign- Prashasan Gaon Ki Ore- I kawtkaiah Sawrkar kalpui a nih thu a sawi a. Heng bakah hian Aspirational RD Block Lungsen-ah rai puar leh naupangte hrisel nan Project BLOOM kalpui a nih bakah, Elementary English Literacy Programme kalpui a nih thu a sawi bawk.
Lunglei SP Pu J. Lalmuankima hnen atangin law and order kenkawh kawnga hmalaknate ngaihthlak a ni a. Kumin July thla tawp thlengin BNS hnuaiah case 89 leh Local & Special law hnuaiah case 127 ziahluh a ni a. Heroin kaihhnawih case 13 ziahluh tawh niin, 1625.88 gm, Rs 48,66,450/- hu man a ni a. Heng bakah hian ralthuam kaihhnawih case 2 ziahluh a ni bawk.Kalkhawmte inhmelhriatirna hun hman niin, Addl. DC Pi Zoramdini’n lawmthu sawiin hun hman a khar a ni. Hemi hnu hian Larsap chuan 20 Assam Rifles Hqrs. Lunglawn tlawhin Commandant Col Jaswinder Singh, SM chuan an hmalaknate a hrilhfiah hnuah sipaite a kawm a. Lunglei Circuit House-ah tlawmngai pawl, Kohhran hruaitute leh Ex-Servicemen te a kawm bakah War Memorial, Chanmari tlawhin sipai martarte zahna lantir nan pangpar a dah bawk.
