Mizoram cleanliness competition 2025-a pakhatna nih lawmna hun siahaah hman a ni
Vawiin han MADC Golden Jubilee Hall, Council Vaih, Siahaah Mizoram khawpui fai inelna 2025-a lawmman pakhatna Siaha district in a lâk lawmna hun hman a ni a, Pu M. Laikaw, CEM, MADC leh Pu VL. Hruaizela Khiangte, Deputy Commissioner, Siaha ten an hmanpui. Pu M. Laikaw, CEM, MADC chuan thu sawiin, Mizoram khawpui fai inelna district headquarter level-ah pakhatna dinhmun Siaha-in a hauh chu a lawm thu leh thawktute zawng zawng a lawmpui thu sawiin, ‘kan dinhmun aṭang hian tlahniam tawh lo tûrin ṭang mar pat ang u’ tiin. District-huapa lawmman lâk bakah khua leh veng bîl anga lawmman lâk tuma ṭan la thar turin kal khawmte a fuih a, ‘kan khúa a fai chuan kan district a fai anga, district zawng zawng kan fai chuan state fai kan nih leh anga, chu chuan India ram chu ram dangte entawn tlak khawpa fai leh mawi a siam dâwn a ni,’ a ti.
Pu VL. Hruaizela Khiangte, Bawrhsap chuan thu sawiin ‘faina kan ngaih pawimawh avangin kum tluana fai kan tum a, varṭianah tual phiat pawlin an phiat a, kawngkama lirthei inhung rei tawh leh insakna bungrua chhek rei tawh endik pawl an awm bakah ṭhutkhawm leh rorel a tam em em a. DC Office hnuaia DPO leh MADC, LADC an thawkho ṭha a, tlawmngai pawl leh mipuiin kan thlawp ṭhat avangin pakhatna lawmman kan la thei a ni a ti. DC chuan district dang aṭanga lo kalte’n Siaha faizia an hmuh hmaih loh thu sawiin, ‘Endikna kan hmachhawn lai chiaha kan fai lo hi a lawmawm a, mikhualin kan dinhmun min hmuhpui a, min fak hi a lawmawm em em a ni. Eng thilah pawh pakhatna nih hi thil har a ni a, faina chungchanga pakhatna nih phei chu lawmman dawn theih ropui ber pawl a ni,’ a ti. Faina lawmman lâk anih ruala ṭan lakna tur ṭhenkhat Pu VL. Hruaizela Khiangte chuan sawiin, ‘Damdawia inchiu ṭhinte zingah district dang aiin kan district-ah HIV/AIDS kai an tam lutuk te hi nu leh pate’n ngun taka kan ngaihtuah a ngai a, Nula tlangval chhuan lo la awm turte hma ngaihna kawngah a thara hma lâk a ngai a, ṭanghona tur tam tak kan la nei a, faina kawnga kan ṭangho ang hian i ṭangrual ang u,’ tiin kal khawmte chu ṭanrualpuiah a sawm a.
Pu K. Chhuabei, EM i/c LAD, MADC chuan Siaha hi a fai reng tur a ni tih hi thupui bera an neih thu sawiin; ‘CEM leh EM Quarters aṭangin faina bul kan ṭan a, quarters ram chhunga ran vulhna in zawng zawng ṭhiah tìr vek an ni. Roreltute aṭanga faina bul ṭan anih avangin khawtlâng mipuiah hnathawh a nuam tawh em em a ni,’ a ti. Pakhatna nih tawh chuan fai leh fai lo kan tehna pawh a danglam dawrh tawh dâwn a, chuvangin a hma aia kan fai lehzual a ngai a, Siaha khawpui ṭhang chho mêkah bawlhhlawh paihna hmun chu khawpui chhung anih deuh dêr tawh avangin bawlhhlawh paihna hmun ṭha zawk sak a ni a, sak zawh anih hunah chuan faina kawngah hma kan sàwn lehzual ngei a rinawm tiin hmalakna hna thawh mêk chanchin a sawi.
