Mizo mitdel tlangval rual an Champion
Mizo Mitdel tlangval rual, Mizoram Blind Football Team ten Greater Lion’s Vision Cup 2025, Siliguri, North Bengal-a neih zawh takah league match atangin tlawm nei lovin champion nomawi an chawi.
Greater Lion’s Vision Cup 2025 hi Indian Blind Football Federation hriatpuina hnuaiah Football Association for The Blind in Bengal (FABB) leh Lions Club of Siliguri Greater-te tangdunin a buatsaih niin, tun thla November Ni 8 leh Ni 9-a Blind Football Tournament Siliguri, North Bengal-ah neih a ni a, he tournament-ah hian State Pali: Jharkhand, Nagaland, Mizoram leh West Bengal-te telin league match-a khelh phawt a ni a,point hmu sang pahnih: West Bengal leh Mizoram team-te chuan final an khel leh a, Mizoram Blind Sport Association hnuaia Mizoram Blind Football Team-te tel vein Mizoram team-te chuanleague match atangin tlawm nei lovin champion nomawi an chawi a ni, Final Match-ah Mizoram team chuan West Bengal chu Mizoram captain Shimon Chorei-a Hat-trick siam hmanga hnehin 3-0-in an chak a, Mizoram team captain Shimon Chorei hi Man of the Tournament leh Top Scorer ah thlan nghal a ni a, tournament chhung hian goal 6 a khung hman a ni. Mizoram Football History a hriatreng tlak, kum 10 liam ta Santosh Trophy-a Mizoram Mipa team ten champion nomawi an chawina khawpui Siliguri-ah ngei Mizo mitdel tlangvalte hian nomawi an chawi ve a, final match-a an hnehna goal pawh Santosh Trophy-a Mizoram team chakna goal zat nen a inang chiah a ni.
Champion team-te hian nimin khan Sairang rawn thlengin Mizoram Blind Sports Association(MBSA) hruaitu thenkhat leh mitdel football ngaihventu ten an lo hmuak a, MBSA Senior Vice President, Pu R Lalramthanga te chenna, Kanan-ah hnehna an chan puala Pathian hnena lawmthu sawina neiin champion team-te hi zanriah an buatsaihsak nghal a, he hunah hian MBSA President, Tv. Lalrampana chuan Mitdel infiamna ngaihlua ngaihventu kalkhawmte leh tlang hrang hranga mitdelte hmakhaw ngaitu Mizo mipui zawng zawng chungah lawmthu a sawi a ni.
