MIRB RSETI-IN KOLASIB BAWRHSAP HOVIN HUN HMANG
Vawiin chawhma khan tunhnaia RSETI tana DST (Domain Skill Trainer) tling tharte pualin Kolasib Bawrhsap Pu Robert C. Lalhmangaiha chuan a Chamber-ah lawmpuina leh fuihna hun sawm bikte nen an hmang.He hunah hian Kolasib Bawrhsap Pu Robert C. Lalhmangaiha chuan thusawiin DST tling tharte a lawmpui takzet a, theihtawpa an mawhphurhnate hlen turin a fuih bawk a. Kolasib in hetiang ang mi chhuanawm tak tak, India ram pum pawha RSETI zirna in zawng zawnga zirtirna pe thei tur Kolasib atanga an awm chu ropui a tiin midangte tana chona anih thu pawh a tarlang. Kolasib Bawrhsap chuan Mahni kutke a ding thei tura thiamna neih chu a hlu hle a ni tiin, Sawrkar hnaah mi zawng zawng an lut vek thei loh thu leh mahni kutke a ding a Self-Employment hna thangtharte’n an ngaituah thin chu lawmawm a tih thu he hunah hian a sawi bawk. Kolasib Bawrhsap hian DST tling tharte hi lawmpuina thilpek a hlan bawk a ni.
He hunah hian Pu C. Laldampuia, Director MIRB RSETI chuan DST hi RSETI an din tirh atanga an harsatna a nih thu leh Sawrkar Department a thawktute atang chauhva zirtirtu an neih thin avanga an Training Programme pawh a kalkhat thin thu a sawi a, tunah chuan khawtual mi ngei DST an neih theih tak avanga Training Programme pawh chi hrang hrang an kalpui theih tawh tur thu a sawi a, khawchhung mite leh Mizoram hmun dang ami te tan pawh hmasawnna a nih ngei a beisei thu a sawi.
Pi Melorie Lalremkim, Chief Manager, MRB Kolasib Branch pawhin he hunah hian DST te chu duhsakna hlanin an zirtir chhuahte chu loan hmanga an bultanna tur lo ngaihtuahsak a ngaih thin avangin uluk tak zirtirna pe a, tihtakzeta zirlaiten an hlawkpui ngei tur zirtirna pe turin a fuih a. Thiamna tak tak paw chhuaklova zirtirna an pek mai mai chuan Loan pawh pe mahsela, engahmah an chan dawn lova, Loan chhia, buaipui ngai takah a chang thin tiin thahnemngai turin a chah bawk.
