Minister Pu Vanlalhlana’n Khawzawl tomato chingtute hnenah mamawh hrang hrang a sem
Transport Minister Pu Vanlalhlana chuan vawiin chawhnu dar 2:30 khan KVK Training Hall Khawzawla Tomato chingtute hnenah an mamawh chi hrang hrang a sem chhuak a, khuallian niin hun a hman pui. Khuallian Pu Vanlalhlana chuan KVK chu an hnathawhah lawmthu hrilhin, vawiina kalkhawm tomato chingtute chu harsatna leh mamawh an neih apianga KVK mithiamte rawn thin turin a chah a, district tana hmasawnna thlentu ni ngei turin a fuih bawk.He hun hi Dr. Malsawmkimi Senior Scientist & Head, KVK Khawzawl chuan kaihhruaiin, Champhai leh Khawzawl District chhunga tomato chingtu mi 555 aiawh in mi 120 an kal khawm a, khaw hrang hrang 6-a Tomato Grower Association hruaitute pawh an tel kim thei bawk.
Chairman Dr. Malsawmkimi chuan vawiina sem chhuah anga thahnem hi hmun dangah IIHR hian an pe chhuak ngai lova, kuthnathawktute thawhrimna vang liau liau a ni tiin kal khawmte chu an thawhrimnaah lawmthu a hrilh bawk.Vawiina tomato chingtute hnena sem chhuahte hi Arka citrus special, Arka vegetable special, Arka Microbial Consortium (Powder), Arka Microbial Consortium (Liquid), Arka Pongamia soap leh vegetable seed kit (mi 555 tan) te an ni a, a vaiin Rs. 17,26,860/- (Nuaih Sawmpasarih Singhnih Sangruk Zariat Sawmruk) man hu a ni a, heng zawng zawng hi ICAR-Indian Institute of Horticultural Research (IIHR) NEH Scheme hnuai atanga lo kal a ni.
He hunah hian Pi R. Vanlalduati, SMS (Soil Science), KVK Khawzawl chuan vawiina sem chhuahte hman dan tur zirtirna leh hrilhfiahna hun a hmang bawk.KVK te hian ni 1.9.2025 khan ICAR- Indian Institute of Horticultural Research (IIHR) NEH Scheme hnuai atang tho in tomato chi kg. 12 an lo sem tawh bawk a. Vawiina pek chhuah te nen hian a vaiin Rs. 21,56,860/- man hu vel an sem chhuak ani.He hunah hian Pu Lalchawimawia, Rabung khua, September thlaa IIHR ten Best Innovative Farmer Award 2025 an hlan hnenah chawimawina leh lawmpuina thuziak pek a ni bawk.
