Minister Pu Lalnghinglova Hmar-In ‘Aizawl West Outlet Project’ Hnuaia Hmalaknate Leh Tuikual North -A Multipurpose Hall Sak Mekte A Endik
Vawiin khan Aizawl West – II bialtu Minister Pu Lalnghinglova Hmar chuan Tuikual lui hrula kawngpui ‘Aizawl West Outlet’ siam hna thawh tur chu a hmunah kalin a endik a, khawtlang hruaitute leh kawng kal dan tur riruang duangtu, ARDECO Design Build leh Contractor-te nen harsatna hrang hrang awm theite leh a chinfel dan tur te, tha tak leh chak taka hna thawh a nih theih dan turte an sawi ho a ni.
Aizawl West Outlet project thil tum sawiin, Minister chuan Aizawl tlaklam venga, veng mawng ping ni thin, Tuikual South (A), Pu Lalrina turning Point-a, laklawh taka motor kawng tawp tawp mai chu, he project kaltlang hian Dinthar veng, Ebenezer Hospital bula chhuak turin intlawhpawhna kawngpui siam a nih tur thu a sawi a. Kawngpui hi Tuikual lui kam dung zuia siam tur a nih thu sawiin Tuikual N, Tuikual S, Dinthar veng chuanhnuaia awmte leh Aizawl tlak lam venga awmte tan, inkalpawhna tangkai tak a nih tur thu a sawi a. Storm Drain Project (tui luankawr siam hna) nena tangkawpin kawngpui hi siam a nih tur thu sawiin ‘rikrum thilah te, chhiatni thatni, faina leh hriselna bakah bawlhhlawh sawngbawl leh ni tin khawsak kawngah mipuite tan a tangkai hle dawn a ni’ a ti a. ‘Zawh fel a nih hunah chuan Aizawl khawpui traffic jam pawhin nasa takin a ziaawm phah thei dawn a ni’ a ti bawk. He project hlenchhuah a nih theih nana thawktu Urban Development & Poverty Alleviation Department chungah leh vengchhung mipuite thlawpnaah lawmthu a sawi bawk a ni.
Project endikna-ah hian UD&PA Executive Engineer Pu C. Malsawma bakah kawngpui riruang duanga, a siam hna enkawla vil zui tura rawih ARDECO Design Build te, Contractor, Studio Hamlet Architects te leh YMA leh Local Council hruaitute an tel a ni.
Aizawl West Outlet Project hi SASCI hnuaia khawpui tui luankawr siam hna ‘Storm Drain Project’ nena tangkawpa thawh tur niin Kilometer 1.6 a thui, feet 12 a zau kawngpui bakah feet 4 a zau foothpath awm thei tura ruahman a ni a, tui luankawr RCC feet 8 a zau felfai taka siam tur ni bawkin he hna thawhna atan hian belhkhawmin cheng vaibelchhe 30 ruahman a ni.
Vawiin vek khan Minister hian Tuikual North-a Multipurpose Hall, Khelo India hnuaia Rs. 11.5 Cr a sak mek pawh a tlawh nghal bawk a ni.
