Minister Pu C. Lalsawivunga’n Chawngtlaiah Sapthei Chin Khuhhawnna a hmanpui
Vawiin khan MIDH Special Intervention 2025-26 hnuaia Sapthei Chin Khuhhawnna hun Nikuala Hall, Chawngtlaiah hman a ni a, Horticulture Minister Pu C. Lalsawivunga chuan khuallian niin khuhhawnna hun a nei.
Minister Pu C. Lalsawivunga chuan Khawzawla sapthei chingtute thawkrim takin an lo thawk thin tawh a, he hamthatna an dawng hi an phu hle a ni tih sawiin sawrkarin an hnathawh tha a hmuh thu a sawi. Kuthnathawktute an hnathawhna reng rengah rinawmna leh dikna vawng tlat turin a fuih a, sapthei chinna kawngah pawh he hamthatna hian rah a neih ngei nan taima taka thawk turin a chah. Sapthei hi India ramah hralh a kal a, a chin nan Mizoram hi hmun rem leh tha a nih avangin Mizoram mipuite’n he hmalakna hi an hlawkpui ngei a rin thu a sawi. A sapthei hralh bakah food processing hmanga siam theih hrang hrang siam a nih theih nan hma an la mek tih thu a sawi a, chung chu kuthnathawktute hlawhtlinnaah a innghat tih a sawi bawk. Minister hian kuthnathawktute hnenah hamthatna a sem nghal bawk a, neem cake/powder te, NPK te, wooden post te leh an mamawh hrang hrang a tel a ni.
He hun hi Horticulture Director Pu C.H. Lalmuanpuia chuan chairman niin hun a kaihruai a, MIFCO Chairman Pu Lalthazuala Rawite leh KVIB Chairman Pu C. Lalremliana te chuan thu tawi sawiin he hmalakna hi mipui leh a hotute’n an hlawkpui ngei nan duhsakna an hlan a ni. Khawzawl Bawrhsap Pu K. Vanlalthiana chuan thu a sawi bawk a, Horticulture Minister leh a hnuaia officer te Khawzawl district an lo tlawh avangin lawmthu a sawi a, kuthnathawktute hmasawn tuma he hun pawimawh tak an tel avangin lawmthu a sawi bawk.
He hunah hian Khawzawl Bawrhsap Pu K. Vanlalthiana, horticulture department hotute leh Chawngtlai leh thenawm khuaa kuthnathawktute an tel a ni.
Sapthei chin khuhhawnna hun hi MIDH, Special Intervention Scheme hnuai atanga hmalak niin, Mizoram pumah district pali (4) thlan chhuah bik, Aizawl, Serchhip, Khawzawl leh Champhai-ah te hmalak tum a ni. Khawzawl District bikah Chawngtlai, Khawhai leh Tualte ah te Farmer 316 hnenah sapthei hi chin tir tum a ni. Hemi Scheme hnuaiah hian Sapthei tiak, leitha, a zamna hrui leh thlai enkawl na tur hmanrua leh damdawi chi hrang hrang pek an nih dawn bakah Banril manah Rs. 40,000/- theuh pek an ni dawn a, a ban phun fel vekte endik an nih hnuah pawisa hi pek chhuah zel an ni ang. Khawzawl district hi Mizorama sapthei thar chhuak tam ber an ni a, chhungkaw 200 chuangin eizawnna atan an hmang a ni.
