Minister Prof. Lalnilawma’n Farkawn Water Supply Scheme a hawng
Minister of State Prof. Lalnilawma chuan vawiin khan Farkawn Water Supply Scheme (Solar Pumping) a hawng a, Farkawn Jt. YMA Hall-ah a lawmnaah khuallian a ni nghal bawk. He hunah hian East Tuipui bialtu MLA Pu Ramthanmawia khual zahawm a ni bawk. Khuallian Prof. Lalnilawma chuan Farkawn Water Supply Scheme a hawng thei ta hi lawmawm a tih thu a sawi a, bialtu MLA te, PHED-a hnathawk hrang hrang te, Village Council member te leh mipuite an hnathawh a that em avanga thleng a ni tih sawiin an chungah lawmthu a sawi. Khawvel sik leh sa inthlak zelah tuihna a kangin a chhe hnem ta zel a, tuihna leh ramngaw humhalh hi a tul em em tawh a ni tih a sawi a, he thu pawimawh tak hi kal khawm zawng zawngte mahni mimal nun theuhah kenglut tlat turin a chah bawk.
Khawtlang mite a hmang ber tur an nihna angin tha tak leh fimkhur taka enkawl a tul dawn tih sawiin sawrkarin pawisa leh bungrua hmanga a tanpuina tha thei ang bera hman a ni theih nan uluk taka enkawl turin a chah a. He Water Supply Scheme hian Farkawn khua leh mipuite chawikangtu leh hmasawnna thlentu a nih ngei theih nan duhsakna a hlan a, harsatna leh buaina a awm a nih chuan theih ang angin tanpui a inhuam zel tih a sawi bawk a ni. Khual zahawm Pu Ramthanmawia chuan Farkawn khua hian Water Supply Scheme tha tak leh changtlung tak an nei ta hi a lawmpui thu a sawi a, kum tam tak chhung hmalakna hrang hrangin vawiin a hruai thleng hi ropui a tih thu a sawi. Water Supply Scheme a awm theih nana hma latu hrang hrangte chungah lawmthu a sawi a, an thawhrahin Farkawn mipuite nasa takin a tanpui a ni tiin a fak a. He Water Supply Scheme thar hi a hlut zia hriain tuihna humhalh nachang leh renchem dan hre turin mipuite a fuih a, harsatna leh chhiatna a awm a nih chuan hotute hnena thlen vat thin turin a chah bawk. He Water Supply Scheme thar hi Farkawn mipuite tan hmasawnna lo thlentu a nih ngei theih nan duhsakna sang ber a hlan a ni.
He hun hi PHED Chief Engineer Er. Lalropuia’n a kaihruai a, Champhai WATSAN Circle Superintending Engineer Er. Lalthanzuali chuan technical report a pe. PHED Secretary Pi Zodingpuii leh Farkawn VCP te chuan thu tawi an sawi bawk a, Champhai WATSAN Division Sr. EE Er. Darthangvunga chuan lawmthu sawiin hun a khar a ni. Farkawn WSS hi NABARD RIDF XXVIII hnuaia thawh a ni a, ni khatah mi pakhat zel tana tui litre 70 pe chhuak thei tura ruahman a ni. Farkawn solar pumping scheme hi nitin tui 4,00,000 ltrs pe chhuak thei tura ruahman a ni. Solar pumping tui lakna hi Tiau lui niin hei hi tih thianghlim hnuah khaw chhungah pump chhoh tur a ni. Hei bakah hian Fanai tui hi gravity hmanga lak niin hei hian Tiau lui tuinu avanga pump theih loh hun a awmin a lo pui thin dawn a ni.
