Minister Prof. Lalnilawma’n 4th Saitual District Secondary School Sports 2025 a khar
Vawiin khan Keifang Centenary Sports Complex-ah Saitual District Secondary School Sports 2025 kharna hun hman a ni a, Minister of State, Tawi East bialtu MLA ni bawk, Prof. Lalnilawma chu khuallian niin hun a hmanpui.
He hunah hian Prof. Lalnilawma chuan thu a sawi a, District Secondary School Sports tluang taka zawh fel a ni leh school 19 lai an tel thei chu lawmawm a tih thu sawiin, organising committee te chu an inbuatsaihnaah te fakawm a tih thu a sawi bawk. Minister chuan zirna (education) chu lehkha zir chauh a ni lo tih a sawi a, infiamna (sports) chu zirnain a ken tel pawimawh tak a ni, a ti.
Minister chuan kawng engkimah thian siam a pawimawh thu a sawi a, he district secondary school sports-ah pawh hian naupangte chuan thian thar an siam ngei a beisei thu sawiin, inthianthatna chu nakin zelah hna thawh naah te a tangkai a ni, a ti.
Minister chuan zirlai naupangte chu zirna chuan an taksa, rilru leh thlarauah hmasawnna thlen se a duh thu a sawi a, infiamna lam a ni emaw zirna lamah emaw, an kalna kawng apiangah a sang ber thleng thei turin a duhsakna a hlan a. Nu leh pateah chauh innghat lo a, mahni kea din tuma, taima taka hlawhtling ngei tura theih tawp chhuah turin zirlai naupangte chu a fuih nghal a ni.
