MINISTER PI LALRINPUII’N SAMPOORNATA ABHIYAAN HMALAKNA CHAWIMAWINA A HLAN
Health & Family Welfare Minister Pi Lalrinpuii chuan vawiin khan Sampoornata Abhiyaan – Samman Samaroh puala State Level chawimawina hun buatsaih chu khuallian niin a hmanpui. He programme hi Synod Conference Centre ah Planning & Programme Implementation Department in a buatsaih a ni. Sampoornata Abhiyaan hi Niti Aayog in India rama hmasawnna chak zawka kalpui a nih theih nan a district leh block hnufual zawk thlanchhuah – Aspirational districts/blocks ah te ngawrh leh zuala Sorkar hmalakna kalpui tura a ruahmanna pakhat a ni a. Thla thum (July 1, 2024 – September 30, 2024) chhungin Aspirational district leh block-ah te hian sorkar hmalakna thlan bikte chu a chhawr tur leh hamthatna dawng tur te chuan an dawng kim vek theih nan ngawrh taka kalpui niin, chung hmalakna thlan bikte chu tehfung parukah then in, an hmalakna hi endik leh a ni a. Mizoramah chuan Aspirational district awm chhun Mamit District chu tehfung pathum tihhlawhtling in “Copper” hlan a ni a. Aspirational Block pathum zingah Ngopa RD Block chuan tehfung zawng zawng hlen kim vekin “Gold” a la a. Block dang pahnih Lungsen RD Block leh Reiek RD Block te chuan tehfung paruk zinga pali chu hlenchhuak in “Bronze” hlan an ni.
Khuallian Minister Pi Lalrinpuii chuan Aspirational Block leh District te an hmalaknaah lawmthu sawiin, heng hmasawnna hnathawh hi lawmman dawn tuma beihna satliah niloin nu nau hrisel zawk, zirna tha zawk leh chhungkua leh khawtlang hmasawnna a hril tel thu a sawi a. Minister chuan Aspirational district leh block te’n hmasawnna hna hrang hrang an kalpui danah hmalakna chhenfakawm tak tak hmuh tur a awm thu a sawi a. Heng hmasawnna tha tak tak te hi Sorkar lama thawktute avang chauh ni lovain, a thawhpui Self Help Group, kuthnathawktute leh khawtlang anga lungrual taka hmalakna rah a nih thu a sawi a. Ram leh khawtlang hmasawnna tura Sorkar hmalaknate chu intihluihna hmanga hlawhtling thei a nih loh thu sawiin, vawiin Aspirational District leh Block chawimawite atangin erawh tanrualna leh thawhho thiamna piah lamah tuina tak tak nen a hmalakna in hlawhtlinna a thlen dan a tihlan thu a sawi.Vawiin programme-ah hian Chief Secretary Pu Khilli Ram Meena pawhin thu sawiin, hun reilote chhunga Aspirational District leh Block te’n hmalakna chu thil chhuanawm tak a nih thu a sawi a. Khawtlang thawhhona avanga hmalakna tha tak tak hmuh a nih thu sawiin, a bik takin Anganwadi leh ASHA worker-te, Self Help Group leh Farmer organization te leh DC leh BDO te chungah lawmthu a sawi a ni.
P&PID Secretary Pu Lalmalsawma Pachuau chuan Sampoornata Abhiyaan chungcahng sawifiahna tlangpui neiin, Aspirational District leh Block aiawhin Additional DC leh BDO te’n hma an lak dan te an sawifiah bawk a. P&PID Principal Adviser-cum-Additional Secretary Dr. Lalrinchhana chuan lawmthu sawiin hun a khar a ni. Sampoornata Abhiyaan hnuaia tehfung te chu –nu nau paiin nau neih hma inenkawlna tha Antenatal Care (ANC) an hmuh te; hridanna (vaccine) a hun taka naupangin an lak te; ICDS in supplementary nutrition an sem kim taka dawn te; farmer te’n Soil Health Card an hmuh ngei a an hman tangkai zui te; zirna in a kawlphetha pek leh zirlaiten an textbook mamawh an neih kim te a tel a ni.
