Minister-i’n skill training program hawng
Vawiin khan Hulhliap – Short Stay Centre, Neihbawi puala buatsaih, Ruihhlo ngai dam mekten a thlawna Thiamthil an zirna – Skill Training Programme chu Pi Lalrinpuii, Hon’ble Minister, Social Welfare, Women & Child Development Department in a hawng. He Skill Training thawh khatna programme hi Hulhliap – Short Stay Centre Course zo, batch khatna leh batch hnihna te pual a ni a; mi 84 in Skill Training hi an dawng dawn a ni. Inkhawm hi Pi Lalzarmawii, IAS, Commissioner & Secretary, Social Welfare Women & Child Development Department in a kaihruai a; Rev. JC Lalramliana, Director, Revival Department, Mizoram Synod leh Hulhliap Core-Committee memberin Hunseh a hmang.
Pi Vanlalhruaii, Secretary, Task group on Aftercare, Skill Traing & Handholding hnen atangin Skill Training chungchang report ngaihthlak a ni a. Skill Training programme puala Thiamthil Zir tur ruahmante chu – Aluminium Fabrication, Assistant Electrician leh Basic Food Processing Course te a ni a; Discipleship Training Institute ah Pathian thu Zir tur an awm bawk. Aluminium Fabrication leh Assistant Electrician hna hi Mission Foundation Movement (MFM) Centre, Dawrpui Vengthar-ah September Ni 1 atanga September Ni 15, 2025 chhungin zirtir an ni ang a. Basic Food Processing Course hi Mizoram Food Processing & Research Centre, Seling-ah riahchilhin September Ni 2 atanga September Ni 5 chhungin zirtir an ni ang.
He huna Khuallian Pi Lalrinpuii, Hon’ble Minister, Social Welfare , Women & Child Development chuan Thiamthil Zir turte chu Hulhliap Centre an chhuahsan hnu pawha Ruihhlo laka an la fihlim zel avanga a lawmpui thu hrilhin, Ruihhlo tel lo nun thlanga nun hman tum tlat zel turin a fuih a. Sorkarin an puala Thiamthil Zirna a buatsaihah hian taima leh am taka zira, tumruhna nen eizawn nana hman tlak ngei tura zir chhuak turin a chah bawk a ni. Hulhliap-Short Stay Centre chungchang report Dr. Lalhriatzuali Ralte, IAS, Special Secretary, LESDE leh Member Secretary, Hulhliap – Short Stay Centre hnen atangin ngaihthlak a ni a. Tunah hian Hulhliap Batch 3 na kalpui niin, patient 170 an awm mek a,anni telin Hulhliap-a enkawl tawh zawng zawng hi mi 1,012 an ni. Inkhawmah hian Pu Malsawmzuala Ralte, Chairperson, Mizoram Youth Commission leh Chairman, Core Committee on Hulhliap – Short stay Centre chu Khualzahawm a ni a; ani hian Hulhliap – Short Stay Centre buatsaih a nih dan leh hmachhawp mekte sawiin, Thiamthil zir turte fuihna thu tha tak a sawi bawk. Lawmthu sawina hun hi Pu Lalnunhlua, Additional Secretary, Social Welfare Women & Child Development Department leh Convener, Task Group on Aftercare, Skill Training & Handholding- in a hmang a ni.
