Mifo-zo meat phochhuahna hun hman a ni

Vawiin khan MIFCO leh ZO MEAT te tangkawp hmalaknain ZO MEAT Product phochhuahna hun, Modern Abattoir, Bungbangla, Zemabawk ah hman a ni a. He hunah hian Pu TBC Lalvenchhunga, Adviser to Chief Minister (Finance) chuan hman puiin Product phochhuahna leh thusawina hun a hmang.

Pu TBC Lalvenchhunga chuan Food Processing pawimawhna sawiin, Mizoramah chuan Self Help Group te hi kan innghahna ber an ni leh thin a ti a. Vawiina MIFCO leh ZO MEAT tangkawp ten hma thar an lakna chu ram tan hmasawnna bungthar ni a a hriat tur leh MIFCO in midangte tana eizawnna kawng an hawnsak chu ropui a tih thu a sawi a. An hmalakna chuan ram tan rah tha a chhuah ngei a beisei a sawi. MIFCO thawhpui ZO MEAT te pawhin theih tawp chhuah turin a beisei thu leh, awmze nei leh mumal taka hmathlir thui tak nei chunga hma la turin duhsakna thu a hlan a. MIFCO chu an Chairman leh thawktute inpekna chu lawmawm tiin, tumruhna leh inpekna nen harsana karah pawh bei dawng lova hmalam pan zel turin a chah a ni.

Adviser to Chief Minister he thawhhona atang hian ram tan hmasawnna a hrinchhuah a beisei thu sawiin, midangte tan eizawnna siam sak mai bakah zoram mipuite tan eitur thianghlim leh hrisel siam chhuak turin a duhsakna a hlan a. Food Processing lama Sorkar hmalakna leh ruahmannate ngaihven reng chunga hmalam pan zel turin a chah a ni.

Vawiin hun hi MIFCO Chairman Pu Lalthazuala Rawite chuan a kaihruai a. ZO MEAT aiawhin Pu Zorinpuia chuan thu sawiin, MIFCO nen hmalak ho a nih dan te a sawi a ni. He hunah hian Pu H. Lalrochama, Manager (Technical), MIFCO Ltd. in hmalak dan report a pe a, Pu C. Lalremliana KVI Board Chairman, Pu R. Vanlalmuana, MIFCO Board Of Director bakah Bungbangla Welfare Member leh MIFCO leh ZO MEAT Staff te an tel bawk a ni.