MI TAM ZAWKIN THISEN AN ENDIK TIR THEIHNA TURA BEIHPUI THAWH HNIHNA HAWNNA HUN SIAHAAH NEIH A NI
Vawiin khan MADC Golden Jubilee Hall, Council Vaih, Siahaah ‘Intensified IEC Campaign & HIV Test drive campaign 2025’ hawnna hun hman a ni a, Pu VL. Hruaizela Khiangte, Chairman, District AIDS Prevention & Control Committee, Siaha leh District Bawrhsap, Siaha nibawk chuan Khuallian niin a hmanpui.Khuallian chuan thu sawiin uar zawka district tana hmalakna kalpui a ni tur chu lawmawm a tih thu sawiin Health department (MSACS) hmalak tawhna leh hmalak zelna tur pawh fakawm a tih thu a sawi. HIV/AIDS chungchang chu a hretu kan ni theuhin a rinawm a, amaherawh chu a hlauhawm dan hi kan la chiang tawk lo niin a lang a, a taka dai khera harh tum emaw kan nih chuan a zia lo hle ang a ti. Inzirtirna kalpui tur chu chhawr tangkaia, a hre ve lote hrilhhretu ni theuh turin kalkhawmte a chah a, a hlauhawmzia hriat hi a tawk a, tem chhin leh tih chhin hi a pawimawh lem lo a ti bawk.
HIV/AIDS chungchangah India ram pum huapin Mizoram hi kan chhuanawm loh em em a, Siaha district-ah vei thar an pung char char bawk a, Mizoram huapa langpha kan ni hi a pawi em em a. Ramri hrula awm kan nih avangin ruihhlo tih leh tawlh kawngah nghawng tha lo tuar thei kan ni a, chuvangin invenna kalpui a pawimawh a. Zirlai naupangte chu ram pawn leh district pawna in kal hunah khawi district atanga lo kal nge tih min zawh hunah kan lo kalna district kan sawiin HIV/AIDS hluarna kan nih reng chuan ngaihdan chintawk min nei palh ang tih a hlauh thu khuallian hian a sawi bawk. Zirlai naupangte chu an zirlai zir tha tur leh ram leh hnam tana ngahfak annih avangin zirtirtute thu awiha nun hmang fimkhur tura fuihin Bawrhsap chuan ‘Thiam theih loh hi hlawhtlin lohna a ni lo va, taihmak hi hlawhtlinna a ni’ a ti. Thiante avanga sualna tem leh tichhin an tam thu sawiin, chumi chuan nun tha lo zawk, sim theih lohna a neih tir tih sawiin, Siaha district-a thalai zawng zawng hian kan thiante leh hmelhriat tha te’n ruihhlo ti pawh ni se ‘Kei chuan ka ti ve lovang’ tih nun kan neih a pawimawh a, ka ti ve lo vang kan tih theuh chuan ruihhlo tel lo khawtlang nuam tak kan siam thei dawn a ni a ti.
Tu tan pawh nun hi sual a, beih hram hram ngai vek a ni a, chumiah chuan hnehtu zawk nih kan tum tur a ni, tlawm zawk kan nih chuan kan chan a chhe telh telh dawn a ni. HIV/AIDS kan dona kawngah emaw kan nun chhoh zelna turah emaw hian ‘Beidawn a thiang lo, beidawng thei ka ni lo’ kan tih a ngai a, beidawnna hian rahtha eng mah a chhuah lo a ni. Beidawng lo tur chuan mi dangin thu tha tinreng min hrilh kan zawm bakah keimahni leh keimahni hi kan infuih char char a ngai a ni, a ti bawk.Vawiin hun hmannaah hian Pi Zingia Hlychho, ICTC Counselor, District Hospital Siaha-in HIV/AIDS chungchanga hriattur pawimawh hrang hrang zirtirna a nei a, Pi Merilyne MS Mawii Beiho, Mental Health Nurse, District Mental Health Programme, Siaha-in ‘Ruihhlo hman sual leh a kaihhnawih chungchang’ a zirtir bawk.District AIDS Prevention & Control Committee, Siaha buatsaih vawiina hun hman hi H. Lalhlunsangi’n kaihhruaiin inlawmna thu Dr. Lalnunziri, Sr. CMO in a sawi a, Siaha khawpui chhunga higher secondary school pali atangin zirlai leh zirtirtu mi 300 vel an tel. Dr. Lalrengpuii Ralte, DACO, Siaha district in lawmthu sawina neiin hun tihtawp a ni. ‘Intensified IEC Campaign & HIV Test Drive Campaign’ thawh hnihnaah hian Siaha district chhunga khaw 25-ah September leh October thla chhung campaign neih tur a ni.
