Mi huaisen chawimawina ‘jeevan raksha padak award’ hlanna hun hmang
Vawiin khan Ministry of Home Affairs, Govt. of India atanga mi huaisen chawimawina ‘Jeeven Raksha Padak Award 2025’ dawngtu, Pu Laltlanzova, Tlangsam, Champhai District chu lawmman hlanna leh chawimawina hun, Home Minister, Office Chamber, MINECO-ah hman a ni a; Home Minister Pu K. Sapdanga chuan he Award-in a kentel chawimawina tangkapui, citation leh pawisa fai 1,00,000/- a hlan a ni. Home Minister Pu K. Sapdanga chuan thu sawiin ‘mizote’ n kan ngaihhlut em em chu mi huaisente an ni’ a ti a; pi leh pute hunlai atang tawha kan thupui ber pakhat pawh ‘thian chhan thih ngam’ tih a nih thin thu sawiin, tunlai khawvelah hetianga mi dangte nunna chhan nana mahni nunna thap ngam, mi huaisen kan nei leh, India ram pum huap chawimawina dawng thei kan nei hi a lawmawmin a ropui takzet a ni’ a ti a, thangthar lo awm lehzel turte tan pawh entawntlak tak a nih thu sawiin thalaite pawhin entawna, thian chhan thih ngam rilru chawinung thar leh theuh turin a sawm bawk a ni.
Vawiin hun hmannaah hian Champhai Deputy Commissioner Pu Mohammad Aaquib pawhin thu sawiin Pu Laltlanzova thiltih chu faktlak leh chawimawi phu a nihzia leh Mizote huaisenna chu fakawm a tih thu a sawi a; Pu V. Lalduhzuala, Joint Secretary (NP), Home Department hnen atangin Award dawn a nih theih nana kalphung awmte ngaihthlak niin Pu Lalnunmawia Chhangte, Under Secretary, Home Department hnen atangin Jeevan Raksha Padak Award chungchang ngaithlak a ni bawk a; Pu F. Zodinpuia, Superintendent, Home Department chuan lawmthu sawiin hun a khar a ni.
Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin niin he chawimawina hi mi huaisen bikte dawn thin a ni a; Pu Laltlanzova hian September ni 7, 2024 (Inrinni) khan Khawzawl District, Dulte khawdai, Dilmawiah tui tla an awm tih a hriat veleh tui tla chhan nan tuiah a zuang lut ve nghal a; Dilmawi hi feet 50 zet a thuk niin, theihtawpa a beih hnuah tui tla hi la chhuakin, a nunna a chhanhim a ni. He a thiltih ropui tak avang leh mi nunna hlu tak a chhanchhuah avang hian Jeevan Raksha Padak Award 2025 dawng tura thlanchhuah niin vawiin December 2, 2025 (Thawhlehni) hian chawimawina hi hlan a ni ta a ni.
