Lungsenah Project Period Pride hnuaiah menstrual health & hygiene awareness programme buatsaih a ni
Lunglei District-a hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) chungchang inzirtirna atana Lunglei District Bawrhsap hma lakna, “Project Period Pride” hnuaiah vawiin khan Lungsen Chhimveng Hall-ah awareness programme buatsaih a ni.
“Awareness Programme on Menstrual Health & Hygiene” hi Lunglei Deputy Commissioner, Health & Family Welfare Department, School Education Department leh Women & Child Development Department te ṭang ho huaihawt a ni a. Lungsena sikul hrang hrang – Government Middle School-I, Government Middle School-II, Gospel Centenary School, Government High School leh Senior Secondary School aṭang te’n zirlai 188 an tel a ni.
He awareness programme-ah hian Lungsen Primary Health Centre (PHC)-a Medical Officer Dr Lalremruati’n hmeichhe thla kip hun bi chungchang bakah, hriselna leh thianghlimna kawnga hriat tur pawimawh hrang hrang a zirtir a. Lungsen ICDS Project-a Child Development Project Officer Pu Vanlalsanga’n nu leh naupang hriselna atana ICDS hnuaia hma lakna bakah, kum tling lova nupui pasal inneih (child marriage) ṭhat lohna leh India ramah khap (phal loh) a nih dan te a sawi fiah bawk.
