Lungsenah “I Kawtkaiah Sawrkar” thawh hnihna buatsaih a ni
Lunglei District Deputy Commissioner (Bawrhsap) Office bul tuma mipuite’n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, “I Kawtkaiah Sawrkar” (Prashasan Gaon Ki Ore) thawh hnihna chu vawiin khan Lungsen leh a chhehvel khaw mipuite tan Lungsen BDO Complex-ah buatsaih a ni.
Vawiina Lungsena I Kawtkaiah Sawrkar hun buatsaihah hian office hrang hrang – Deputy Commissioner, BDO Lungsen, PHED, Power & Electricity, Health & Family Welfare, Agriculture, Horticulture leh Bank te’n stall hawngin, awlsam zawka mipuite dawr theih turin an inpho chhuak a. Aadhaar siam ṭhat/siam thar, MGNREGS job card siam ṭhat/siam thar, bank account hawn thar, income/tribal/residential certificate pek chhuah, sawrkar scheme hrang hranga inziah luh, hriselna dinhmun endikna leh mipuiin harsatna an thlenna hun te buatsaih a ni a. He’ng service hrang hrang chhawp chhuahte hi mi 168-in an chhawr ṭangkai a ni.
