Lungsen Block chhunga Putlungasih khuaah Project LEAP kal tlangin vohbikte tan health assessment camp buatsaih a ni
Lunglei District Bawrhsap hma laknaa Lunglei District-a vohbikte chawi kanna tur ruahmanna – Project LEAP (Lunglei’s Empowerment for Access and Equity for all Persons) hnuaiah vawiin khan Lungsen RD Block chhunga Putlungasih khuaah vohbikte hriselna dinhmun endikna, health assessment camp buatsaih a ni.
Health & Family Welfare Department Lunglei aṭangin Sr Specialist (Orthopedician) Dr Joseph Lalrindika Chawngthu hovin Audiologist, Clinical Psychologist leh Ophthalmic Assistant te, NCD Medical Team te, Social Welfare-a thawktute leh Lungsen BDO staff-te’n Putlungasihah hian kal chilhin, camp pantute hi an endik a.
Lungsen Block chhunga Putlungasih, Bolia, Zawlpui, Tuisenchhuah, Belthei leh Kauchhuah khua aṭangin vohbik mi 32 inentirin, an dinhmun endik a nih bakah, UDID card nei lote chu card siamsak turin UDID portal-ah thun nghal an ni a. ALIMCO aṭanga ṭanpuina hmanraw chi hrang hrang – wheelchair, bengdar, mitdel tiang, zakdawh tiang leh hmanraw dang dilsak turte chhinchhiah nghal an nih bakah, Healthy Lunglei District Campaign hnuaiah natna inkai chhawn theih loh (non-communicable disease – NCD) leh natna dang endik nghal a ni bawk.
