Lungsen Aspirational Block huam chhungah Healthy Lunglei District Campaign kalpui mek a ni
Lunglei District Deputy Commissioner hma laknaa RailTel Corporation of India Limited, New Delhi aṭanga Corporate Social Responsibility (CSR) sum hmuh kal tlangin Healthy Lunglei District Campaign hnuaiah Lungsen Aspirational Block huam chhung khaw hrang hrangah inkai chhawn theih loh natna (non-communicable disease) chungchang inzirtir leh inentir runpui (NCD awareness & screening camp) kalpui mek a ni.
Healthy Lunglei District Campaign hnuaia Lungsen Aspirational Block huam chhunga hma lakna hi May ni 9, 2025 aṭang khan ṭan niin, Lunglei District health & family welfare department hnuaia doctor, nurse leh thawktute’n khaw hrang hrangah kal chilhin thisensang leh zunthlum an endik bakah, a mamawhte hnenah a thlawnin damdawi sem a ni bawk a. Zunthlum leh thisensang leh natna inkai chhawn theih loh (NCD) dang laka inven dan tur leh nunphung hrisel nei thei tura thil pawimawh hrang hrangte inzirtir ṭhin a ni bawk.
Campaign hi May leh June thla chhung kalpui tura ruahman niin, thisensang leh zunthlum endik zat tur atan kum 30 chin chung lam mi 3,000 aia tlem lo tinzawn a ni a. Khaw 10 – Lungsen, Zawlpui, New Vuakmual, Putlungasih, Kauchhuah, Phairuangchhuah, Belthei, Phairuangkai, Rotlang West leh Chhumkhum-ah te health camp buatsaih tawh niin, he’ng khaw 10 aṭang hian mi 481 te hriselna dinhmun endik tawh a ni a. Thisensang (hypertension) tih hriat chhuah thar 23 leh inhre sa endik nawn 80 awmin, zunthlum (diabetes mellitus) hriat chhuah thar 27 leh inhre sa endik nawn 50 an awm a ni.
