Lungsen Aspirational Block-ah Elementary English Literacy Programme an kalpui ṭan

8 months ago Sonakshi Sarkar

Lungsen Aspirational Block huam chhunga primary sikul zirlaite’n English zirna lama hma an sawn theihna tura Lunglei Deputy Commissioner (Bawrhsap) office leh Disha Foundation te ṭang kawpin ‘Elementary English Literacy Programme’ (EELP) an ruahman chu a taka kalpui ṭan a ni.

Lungsen Aspirational Block huam chhunga Aspirational Block Programme hnuaia EELP kalpuina tur hian primary sikul sawm (10) – Government Primary School-I, Lungsen; Government Primary School-II, Lungsen; Government Primary School-III, Lungsen; Government Primary School, Belthei; Government Primary School-I, Lungrang; Government Primary School-II, Lungrang South; Government Primary School, Rangte; Government Primary School, Rualalung; Government Primary School, Lalnutui leh Government Primary School, Kauchhuah te thlan chhuah an ni a. He’ng sikulahte hian vawiin khan zirlai naupangte’n English an thiam dan hriatna tura enchhinna, pre-assessment test buatsaih a ni.

Ruahman lawk dan chuan, July ni 11, 2025 (Zirtawpni)-ah Lungsen BDO Conference Hall-ah he’ng sikul thlan bika English zirtirtute tan ‘Teacher Training’ buatsaih a ni dawn a. Kum 2025-2026 session first term exam zawh aṭangin zirlaite training kalpui ṭan tur niin, March 2026 thlengin training hi kalpui a ni dawn a. Zirlaite hmasawn dan finfiahna turin a khat tawkin test buatsaih ṭhin a ni bawk ang.