Lungsen Aspirational Block-a zirlaite tana “Book Nest Initiative” hnuaia lehkhabu khawn khawm kalpui dan thlir ho a ni
Vawiin khan Lunglei District Bawrhsap Pi Navneet Mann kaihhruaiin a hna thawh pindanah Lunglei Bawrhsap hma laknaa, Lungsen Aspirational Block-a zirlaite tana lehkhabu khawn khawm runpui, “Book Nest Initiative” kalpui mek dan thlir ho a ni. He ṭhut khawmah hian DC Office, Education, UD&PA leh I&PR-a official-te leh Lunglei Sub-Headquaters YMA hruaitute an tel a. September ni 8 – 15, 2025 chhunga Lunglei khawpuia Sub-Headquarters YMA hnuaia branch 21 kal tlanga lehkhabu khawn khawm kalpui mek dan report ngaihthlak a ni a. Branch hrang hrangte hian section kal tlangin lehkhabu hi an khawn mek thu leh branch ṭhenkhat chuan a khawn khawm bik chu an zawh fel tawh thu tar lan niin, lehkhabu khawn khawm bik hi tun kar chhunga zawh fel beisei a ni a.
Lehkhabu hi Lungsen khawpui chhunga YMA branch-te kal tlangin khawn ve ni se, Lungsen BDO hovin YMA hruaitute’n ruahmanna lo siam se, tih a ni a. Lehkhabu khawn khawm sa thliar fel leh sem chhuah tlak a nih leh nih loh endik hi branch tinah YMA leh Self Help Group (SHG)-te buaipui tura tih a ni. Lehkhabu khawn khawmte hi sem chhuah theiha ruahman fel a nih hnuah Lungsen Aspirational Block huam chhunga sawrkar sikul 60 thlan chhuah bikte hnenah sem tura ruahman a ni a. Lehkhabu pek tur sikul thlan chhuahte hi lehkhabu dahna tur chhuar, “Book Nest” siam turin Lungsen SDEO kal tlanga hriattir tawh niin, tun kar chhungin an siam zawh hman beisei a ni.
Lehkhabu khawn khawm runpui zawh hnuah a kharna hun hman tum niin, he hunah hian Book Nest Initiative hnuaia lehkhabu khawn khawm ṭha branch panga leh SHG te hnenah lawmman pek tum a ni a. Lehkhabu khawn sate thliar fel a nih hnuah a thawn chhuahna hun (flag off programme) buatsaih ni se, tih a ni bawk.
