Lungsen Aspirational Block-a Rangte leh Phairuangkai khuaahte Project Period Pride menstrual health & hygiene awareness programme buatsaih a ni
Lunglei District-a hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) chungchang inzirtirna atana Lunglei District Bawrhsap hma lakna, “Project Period Pride” hnuaiah vawiin khan Lungsen Aspirational Block huam chhunga Rangte leh Phairuangkai khuaahte awareness programme buatsaih a ni.
“Awareness Programme on Menstrual Health & Hygiene” hi Lunglei Deputy Commissioner, Health & Family Welfare Department, School Education Department leh Women & Child Development Department te ṭang ho huaihawt a ni a. Chawhma lamah Rangte Community Hall-ah Government Middle School, Rangte leh RMSA Secondary School, Rangte zirlaite tan hun buatsaih niin, zirlai 52 an tel a. Chawhnu lamah Government Middle School, Phairuangkai leh RMSA Secondary School, Phairuangkai zirlaite tan Government Middle School, Phairuangkaiah hun buatsaih ni thungin, zirlai 47 an tel bawk.
He’ng awareness programme buatsaihah hian Lungsen Primary Health Centre (PHC)-a Medical Officer Dr Lalremruati’n hmeichhe thla kip hun bi chungchang bakah, hriselna leh thianghlimna kawnga hriat tur pawimawh hrang hrang a zirtir a. Lungsen ICDS Project-a Child Development Project Officer Pu Vanlalsanga’n nu leh naupang hriselna atana ICDS hnuaia hma lakna a sawi fiah bawk a. H&FW leh ICDS aṭangin zirlaite tan quiz buatsaih a ni bawk.
