Lungleiah Saikuti Hall Managing Committee an ṭhu khawm
Vawiin khan Saikuti Hall Managing Committee chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei Municipal Council (LMC) kuta Saikuti Hall hlan chhawnna tur ruahmanna, ‘terms & conditions’ an thlir ho.
Chairman Pi Navneet Mann chuan Mizoram sawrkar hnuaia Saikuti Hall Managing Board aṭangin Saikuti Hall chu LMC kuta hlan chhawng tura ruahmanna a awm thu sawiin, Lunglei DC kaihhruai Managing Committee chu inhlan chhawn dan tur ‘terms & conditions’ duang tura ruat a nih thu a sawi a. Chumi bawhzui chuan draft pawh duan a nih thu a sawi. He hunah hian Saikuti Hall enkawl zui tura LMC kuta hlan chhawnna tur ‘terms & conditions’ duan chu thlir ho niin, siam ṭhat ngai laite siam ṭhat dan tur rawtnate sawi ho a ni a. Thuneitu sang zawka thlen ngai leh zir chian ngaite bawhzui hnuah la thlir ho leh ni se, tih a ni.
Lungleia Saikuti Hall hi Management of Saikuti Hall Rules, 2003 hmangin enkawl a ni a. He dan hnuaiah hian Rural Development Department Secretary kaihhruaina hnuaiah Saikuti Hall enkawl chungchanga thuneitu Managing Board awmin, a taka enkawl zui hna thawk turin Lunglei District Deputy Commissioner kaihhruaina hnuaiah Managing Committee a awm bawk a ni.
