Lungleiah ruihhlo do kawng zawh leh ruihhlo ṭhat lohzia inzirtirna buatsaih a ni
Lunglei District Nasha Mukt Bharat Abhiyan (NMBA), Lunglei District SP Office, Lunglei District School Education Department leh Lunglei District Legal Services Authority (DLSA) te ṭang ho huaihawtin vawiin chawhma khan Lunglei khawpui chhungah ruihhlo do kawng zawh leh ruihhlo ṭhat lohzia inzirtirna, “Grand Rally Against Drug Abuse and Illicit Drug Trafficking & Drug Awareness Programme” buatsaih a ni.
Ruihhlo do kawng zawhah hian Lunglei khawpui chhunga sikul hrang hrang aṭangin zirlai 600 vel an tel a. Rally hi Lunglei khawpui chhunga hmun pahnih – Kikawn leh Government High School (Chanmari) aṭangin a rualin ṭan a ni a. Govt High School aṭanga chhuakte hi Lunglei Senior Civil Judge Pi Lalthansiami Hnamte chuan vai liamin, Kikawn aṭanga chhuakte hi Lunglei Sub-Divisional Officer (Sadar) Pi TT Beikhaizi chuan a vai liam thung a. Kawng zawhte hi Saikuti Hall, Lungleiah intawk khawmin, ruihhlo ṭhat lohzia inzirtirna buatsaih chhunzawm nghal a ni.
Drug Awareness Programme-ah hian Deputy Inspector General of Police (Southern Range) Pu Altaf Ahmad Khan chu Khuallian a ni a. Zirlaite leh mipui pung khawmte chu ruihhlo laka inthiar fihlim tur te, mi dang hnena ruihhlo ṭhat lohzia zirtir chhawng tur leh a theih ang anga dan leh thupek keng kawhtute thawhpui a, ṭawiawm ṭhin turin a chah.
Lunglei District Education Officer Pu Micky R. Lalenkawla’n hun kaihruaiin, Lunglei District Superintendent of Police Pu J. Lalmuankima’n kal khawmte lawmna thu a sawi a. DLSA aṭangin Advocate Pu ZD Lalnunsanga chuan ruihhlo leh a kaihhnawih dan pawimawh hrang hrang zirtirin, Excise & Narcotics Department-a Sub-Inspector Vanlalfinga chuan ruihhlo hman sualin nghawng leh rah chhuah ṭha lo a neih theih hrang hrangte a sawi fiah a. Lunglei Sub-Headquarters YMA President Pu K. Lalfakzuala pawhin thu sawiin, Additional Deputy Commissioner Pi Zoramdini chuan lawm thu sawiin hun a khar.
