Lungleiah NMBA kum 5 tlin pualin hun hman a ni
Vawiin khan India ram hmun dang rualin India ram pum huap ruihhlo do beihpui thlakna, “Nasha Mukt Bharat Abhiyaan (NMBA)”-in kum 5 a tlin pualin Lunglei DC Conference Hall-ah hun hman a ni. Additional Deputy Commissioner Pi Zoramdini chuan hun kaihruaiin, hun hman chhan a sawi fiah a. Lunglei District-a NMBA hnuaia hma lakna hrang hrangte tar langin, ruihhlo ṭhat lohzia inzirtirna atan, “Breaking the Chains: Prevention, Treatment, and Recovery for All” (Ruihhlo khaidiat chhut chah: mi tin tana invenna, enkawlna leh tihdamna) tih thupui hmangin Be a DC/BDO for a Day, BookNest, I Kawtkaiah Sawrkar (Prashasan Gaon Ki Ore) leh District Level Drawing Competition hun buatsaih a nih thu te, sawrkar pisa leh zirna in hrang hrangah ruihhlo laka inthiar fihlim tura thutiam lak a nih thu te a sawi.
He hunah hian Police, Excise & Narcotics, District Legal Services Authority (DLSA) leh Sub-Headquarters YMA te’n ruihhlo do kawnga an hma lak tawhna leh hmachhawp an neihte an tar lang a. District Social Welfare Officer Pu C. L. Joseph chuan Social Welfare hma lakna a tar lang a. Sub-Deputy Commissioner Pi Lalnunchhani Hnamte chuan ruihhlo ngaite enkawlna Hulhliap Short Stay Centre kalpui a nih dan tar langin, a mamawhte’n zau zawka an chhawr theih nana hma la tlang turin kal khawmte a ngen. Ruihhlo awm lohna rama India siam tura hma lakna, Nasha Mukt Bharat Abhiyaan (Drug Free India Campaign) chuan kumin 2025 hian kum 5 tlingin, kum 5 a tlin pualin vawiin khan sawrkar laipui Ministry of Social Justice & Empowerment chuan Amritsar-ah Prime Minister Event a buatsaih a. Hon’ble Prime Minister of India leh Hon’ble Union Minister i/c Ministry of Social Justice & Empowerment chuan he hun hi hmanpuiin, State tina Chief Minister-te leh sawrkar mi pawimawhte pawhin a hmun ngeiah leh online hmangin an chhim bawk a.
Amritsar-a Prime Minister hova hun hmannaa Prime Minister thuchah leh hun hmante hi Lunglei District-a hun hmannaah hian online-a chhim a ni bawk. Nasha Mukt Bharat Abhiyaan hi India ram chhunga State 28 leh Union Territory 8-ah kalpui mek niin, district zawng zawng tuam chhuakin hma lak a ni a. District tina Deputy Commissioner-te kaihhruaina hnuaiah ruihhlo la ti ve lote ven him an nih zel theih nan leh a ti tawhte’n enkawlna ṭha an dawn theih nan ngawrh taka hma lak a ni.
