Lungleiah Mizoram District Transformation Programme hnuaia hna thawh tur rawtna lutte thlir hovin District Planning Committee an ṭhu khawm
Vawiin khan Lunglei District-a hmasawnna hna thawh hrang hrang huap zo, rualkhai leh awmze nei zawka kalpui a nih theih nana hma la tura din District Planning Committee (DPC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. Mizoram District Transformation Programme (MDTP) hnuaia District Catalytic Intervention Plan (DCIP) kal tlanga hmasawnna hna thawh tur rawtna lutte an thlir ho.
Kum 2025–2026 atana MDTP hnuaia District Catalytic Fund (DCF) kal tlanga Lunglei District-a hmasawnna hna thawhna tur department 13 aṭanga rawtna (project proposal) 22 lut chu he hunah hian thlir ho a ni a. Project 11, cheng nuai 90 man hu chu kumin atana kalpui turin pawm a ni a. Rawtna dang chu kum thara ngaihtuah ṭhat atan dah a ni. DCIP hnuaia hna thawh turah hian scheme dangin a huam loh te, department dang nen thawh hona ṭha (convergence) awm theihna tur leh khawtlang hmasawnna tur hma lakna thar te chu ngaih pawimawh tura tih a ni.
Lunglei District-a MDTP kalpui turah hian district dinhmun zir chianna, District Baseline Profile (DBP) leh district chhung hmasawnna tur hmathlir, District Transformation Vision (DTV) chu State sawrkar Planning & Programme Implementation Department-ah theh luh tawh a nih thu tar lan a ni a. Hemi mil hian sawrkar laipui leh State sawrkar kal tlanga hmasawnna hna thawh tur hrang hrang chu kalpui ṭhin a ni tawh dawn a ni.
